Umsjónarsamningur um Dyrhólaey samþykktur

Umhverfisráðuneytið hefur staðfest samning um umsjón og rekstur friðlandsins í Dyrhólaey sem gerður var af Umhverfisstofnun og sveitarfélaginu Mýrdalshreppi. Í samningnum er meðal annars kveðið á um réttindi og skyldur samningsaðila, mannvirkjagerð og aðrar framkvæmdir, landvörslu, menntun starfsmanna, móttöku ferðamanna og fræðslu.

Samningurinn veitir Mýrdalshreppi ekki vald til ákvarðana á borð við lokun og opnun friðlandsins, og munu allar stjórnvaldsákvarðanir varðandi friðlandið vera teknar að undangengnu faglegu mati umhverfisstofnunar.

Umhverfisráðuneytið segist í fréttatilkynningu sinni harma það ástand sem ríkt hefur vegna friðlandsins í Dyrhólaey og átaka innan sveitarfélagsins vegna þess. „Friðlandið í Dyrhólaey er mikilvægt náttúruverndarsvæði sem okkur ber skylda til að varðveita og tryggja að það geti verið gestum þess um ókomna tíð upplifun um sérstæða og einstaka náttúru."