Flugeldasýning á White Hart Lane

Tveir leikir fóru fram í ensku úrvalsdeildinni í knattspyrnu í kvöld. Tottenham og Chelsea áttust við í ótrúlegum leik á White Hart Lane og Cristiano Ronaldo hélt áfram að skora fyrir Manchester United þegar liðið lagði Bolton heima.

Tottenham og Chelsea skildu jöfn 4-4 í ótrúlegum leik á White Hart Lane.

Það var Chelsea sem byrjaði leikinn mikið betur og það var Didier Drogba sem braut ísinn snemma leiks. Chelsea virtist hafa komist í 2-0 skömmu síðar en mark liðsins var dæmt af.

Jonathan Woodgate jafnaði fyrir heimamenn með laglegum skalla eftir hornspyrnu á 12. mínútu. Michael Essien kom Chelsea aftur yfir á 20. mínútu og þannig var staðan í hálfleik.

Tottenham-menn komu ákveðnari til síðari hálfleiksins en Chelsea virtist fara langt með að tryggja sér sigurinn eftir að Joe Cole skoraði laglegt mark á 52. mínútu.

Heimamenn voru þó ekki hættir og þeir Dimitar Berbatov og varamaðurinn Tom Huddlestone jöfnuðu metin með mörkum á 61. og 75. mínútu.

Joe Cole var aftur á ferðinni fyrir Chelsea þegar hann kom liðinu yfir á ný á 79. mínútu en enn og aftur jöfnuðu heimamenn. Robbie Keane skoraði með glæsilegu skoti á 88. mínútu.

Dimitar Berbatov fékk svo síðasta marktækifæri leiksins í uppbótartíma en Carlo Cudicini varði meistaralega frá honum í algjöru dauðafæri.

Ronaldo skorar enn

Portúgalska undrið Cristiano Ronaldo gerði út um leik Manchester United og Bolton með því að skora tvö mörk á fyrstu 20 mínútum leiksins á Old Trafford í kvöld, en honum lauk með 2-0 sigri Manchester United.

Fyrra markið hans kom eftir mikinn atgang í teig Bolton en það síðara var þrumufleygur beint úr aukaspyrnu. Ronaldo hefur nú skorað 34 mörk í öllum keppnum í vetur.

Bæði lið fengu reyndar talsvert af marktækifærum það sem eftir lifði leiks, en sigur meistara United var fyllilega verðskuldaður. Grétar Rafn Steinsson var á sínum stað í liði Bolton og barðist eins og ljón - og uppskar meðal annars blóðnasir eftir viðskipti við Carlos Tevez.

Manchester United hefur nú þriggja stiga forskot á Arsenal á toppi úrvalsdeildarinnar.

1. Man Utd - 70

2. Arsenal - 67

3. Chelsea - 65

4. Liverpool - 59