Lítið um slys í tugum árekstra

Tuttugu árekstrar urðu milli klukkan fjögur og fimm í Reykjavík í gær. Að sögn lögreglunnar í Reykjavík voru þrír fluttir á slysadeild en meiðsli þeirra voru minniháttar. Margir eru enn á sumardekkjunum og telur lögregla að snjórinn hafi komið fólki nokkuð í opna skjöldu. Vesturlandsvegur lokaðist sunnan Hvalfjarðarganga um tíma eftir hádegið vegna bílveltu sem þar varð. Ekki reyndist um alvarleg meiðsl að ræða.

Strætó fauk út af á leið á Kjalar­nes. Enginn meiddist en ferðir á Kjalarnes féllu niður það sem eftir var dags. Almenningssamgöngur gengu að öðru leyti þokkalega þó að talsverðar seinkanir hafi orðið. "Umferðin gekk hægt fyrir sig og það hafði vissulega áhrif á tímaáætlanir hjá okkur," segir Ásgeir Eiríksson, framkvæmdastjóri Strætó.

Á sama tíma og veðrið var til ama hér á landi hafa Norðmenn notið fádæma blíðu. Í bænum Vigra í Noregi náði hitinn í gær tuttugu gráðum og klukkan 18 í gær var sautján stiga hiti í Kristjánssundi. Þar ríkja suðvestlægar áttir með hlýju lofti. Veðurstofan býst við hvassri norðvestanátt í dag með snjókomu og skafrenningi, einkum norðanlands, en veður gangi þó heldur niður þegar líður á helgina.