Man Utd hyggst opna spilavíti

Flest bendir til þess að spilavíti verði opnað í nágrenni við Old Trafford, heimavöll Manchester United. Þetta ríkasta knattspyrnufélag í heimi hefur sótt um leyfi fyrir byggingu glæsibygginga sem innihalda 5 stjörnu hótel með spilavítum, veitingastaði og heilsulind í nágrenni vallarins. Stjórn Man Utd stendur að umsókninni ásamt bandaríska spilavítasamsteypunni Las Vegas Sands en allt veltur þetta þó enn á að leyfið fáist. Félagið nýtur nú þegar stuðnings Trafford-hverfisráðsins í Manchesterborg og samkvæmt nýjum lögum í Bretlandi um spilavíti fer umsóknin nú til umfjöllunar hjá sérstakri nefnd á vegum ríkisstjórnarinnar. Rodney Brody talsmaður bandarísku spilavítakeðjunnar er bjartsýnn á að leyfið fáist og vonast til að fjöldi nýrra starfa muni hjálpa þar til. "Verkefnið getur skapað allt að 2000 ný störf" sagði Brody í viðtali við Reuters fréttastofuna síðdegis í dag.