Sögu­leg endur­koma Knicks

Spurs byrjaði leikinn frábærlega og var vel yfir í fyrri hálfleik 76-49. Í hálfleik hefði jafnvel verið hægt að halda því fram að Spurs væri búið að vinna leikinn en sögulegir hlutir áttu eftir að gerast.

Í síðustu tveimur leikhlutunum var eins og Spurs-liðið væri einfaldlega búið á því. Það var engin orka frá liðinu og skoraði liðið aðeins fjórtán og sextán stig í hvorum leikhluta.

Stjarna leiksins var án efa OG Anunoby hjá Knicks. Hann var ekki með flest stig en þegar það skipti máli þá steig hann upp. Þegar aðeins 5,7 sekúndur voru eftir var Knicks einu stigi undir en héldu boltanum. Stigahæsti leikmaður liðsins, Jalen Brunson, fékk boltann og skaut nánast strax. Boltinn fór í hringinn en Anunoby sveif manna hæst og blakaði boltanum ofan í körfuna.

Þetta reyndist síðasta karfa leiksins og tryggði Knicks ótrúlegan eins stigs sigur, 107-106. Þetta var ekki eina mikilvæga atvik Anunoby í lokin. Spurs hefði getað klárað leikinn eftir að hafa unnið boltann þegar Spurs var einu stigi yfir, 106-105. De’Aron Fox hjá Spurs keyrði upp völlinn og ætlaði að setja auðvelt sniðskot niður en þá kom Anunoby upp úr þurru og blokkaði skotið.

Mikil fagnaðarlæti brutust út í New York-borg eftir sigurinn. Knicks geta í næsta leik tryggt sér NBA titilinn í fyrsta skipti síðan 1973.