Guðjóni hefur fengið verri spá

Guðjóni Þórðarsyni og lærisveinum hans hjá Keflavík er spáð sjötta sæti Landsbankadeildarinnar í ár af kollegum þeirra í deildinni. Er þetta með því lægsta sem Guðjóni hefur verið spáð hingað til á hans þjálfaraferli, en þó ekki það allra lægsta. "Mér var spáð fallsæti þegar ég byrjaði með Skagann 1987. Eins höfðu menn ekki mikla trú á mér þegar ég fór til KA svo að þetta er bara skemmtilegt," sagði Guðjón í samtali við Fréttablaðið eftir blaðamannafund KSÍ í gær. "Markmið mitt er mjög einfalt - að gera Keflavík að það sterku liði að það verði mjög erfitt að vinna það," bætti Guðjón við fullur sjálfstraust og má leiða að því líkur að keppnismaðurinn Guðjón Þórðarson muni leggja allt í sölurnar í sumar til að hrekja þessari spá. "Auðvitað eru alltaf gerðar væntingar. Ég hef skilað góðum árangri með mín lið undanfarin ár og þó ég hafi ekki verið lengi í baráttunni hér heima tel ég það vera eðlilegt," segir Guðjón sem kveðst ekki finna fyrir meiri pressu nú en oft áður. "Ég er meðvitaður um að hlutirnir gerast ekki á einni nóttu. Ég hef aðeins verið hérna í nokkra mánuði og er að reyna að breyta hlutunum hægt og rólega en til þess að gera Keflavík að öflugu félagi þarf margt að breytast og bæta marga þætti," sagði Guðjón og nefndi umgjörð og marga aðra þætti sem lúta að félaginu í því sambandi. "Það er ennþá verið að móta liðin í deildinni og þar er Keflavík engin undantekning. Ég hafði í hendinni um daginn nokkra menn sem áttu að koma til mín en síðan gekk það úr skaftinu svo að ég þurfti aðeins að endurskipuleggja mig," sagði Guðjón og virðist meðvitaður um að leikmannahópur Keflavíkur þurfi á auknum liðsstyrk að halda fyrir sumarið. Hann telur spánna sem gerð var kunn í gær vera nokkuð raunsæja. "Ég tel að FH og KR séu með sterkustu leikmannahópanna og Hafnfirðingar unnu mótið í fyrra mjög verðskuldað. Þeir hafa bara verið að styrkjast svo að ég tel fullkomnlega raunhæft að þeim sé spáð sigri."