Fá tæpar 300 krónur á tímann

"Þetta er grafalvarlegt að mínu viti enda þýðir þetta að vandamál sem hefur verið nokkuð einskorðað við framkvæmdir á hálendi Íslands grefur nú um sig í þéttbýlinu," segir Vilhjálmur Birgisson, formaður Verkalýðsfélags Akraness. Í ljós hefur komið að bátasmiðjan Sputnik fékk til sín fimm pólska verkamenn til starfa í þrjá mánuði gegnum erlenda leigumiðlun fyrir 2.1 milljón króna. Vilhjálmur ætlar í dag að leggja fram kæru á hendur fyrirtækinu hjá sýslumanninum á Akranesi en hann fullyrðir að umræddir Pólverjar starfi 250 klukkustundir í hverjum mánuði. "Þessir menn hafa engin atvinnuleyfi og forráðamenn vísa í dóm þann er féll vegna erlendra starfsmanna GT verktaka við Kárahnjúka. Á meðan hafa aðrir atvinnurekendur komið að máli við mig og bíða spenntir eftir niðurstöðu þess hvort þetta sé löglegt og eðlilegt því þá hyggist þeir endurtaka leikinn. Það sé eina leiðin til að vera samkeppnishæfir enda eru umræddir Pólverjar með rúmlega 70 þúsund krónur á mánuði. Það þýðir tæplega 300 krónur á tímann og ef komist verður að þeirri niðurstöðu að þetta sé löglegt og eðlilegt munu örlög fjölmargra íslenskra verkamanna verða talin." Verkalýðshreyfingin hefur sent Vinnumálastofnun erindi vegna þessa máls en Gissur Pétursson, forstjóri hennar, hafði ekki yfirfarið öll gögn málsins þegar í hann náðist. "Við leggjumst yfir gögnin núna og skoðum hvað þarna er á ferð. Í fljóti bragði virðist þetta vera álitamál hvort þetta sé hefðbundin launavinna eða einhvers konar þjónustuviðskipti en þetta er keimlíkt öðrum málum sem ratað hafa inn til okkar að undanförnu og valdið ágreiningi. Sveinn Andri Sveinsson er lögmaður þess fyrirtækis sem um ræðir en ekki náðist í hann í gærkvöldi.