Manns leitað í Þjórsárdal

Leit að karlmanni á níræðisaldri, sem saknað er í Þjórsárdal frá því í gærkvöldi, hefur enn engan árangur borið. Maðurinn var þar í útilegu ásamt fleirum og fór einn í gönguferð í gærkvöldi. Þegar hann kom ekki til baka á tilsettum tíma hóf samferðafólk hans leit að honum og um klukkan þrjú í nótt var óskað aðstoðar björgunarsveita. Um tuttugu björgunarsveitarmenn og fjórir hundar eru nú við leit. Gott veður var á svæðinu í alla nótt og eru leitarskilyrði góð, nema hvað skógur og kjarr gera það að verkum að leitarmenn fara hægar yfir en ella.