Ólafur Darri gróf Inga lifandi

„Ólafur er bastarður í myndbandinu - reiður og aggressívur. Hann er ruslakarl á daginn og gefur lík á kvöldin,“ segir tónlistarmaður Ingi Örn Gíslason.

Ingi leggur nú lokahönd á myndband við lagið Power to the Bastards, sem kom út á plötunni Human Oddities árið 2008. Stórleikarinn Ólafur Darri Ólafsson leikur aðalhlutverkið í myndbandinu og grefur meðal annars Inga lifandi.

Ingi þekkti Ólaf ekki áður en hann ákvað að taka sénsinn á því að bjóða honum að leika í myndbandinu. „Það er magnað að hann hafi verið til í þetta,“ segir Ingi. „Mig langaði að sýna þennan bastarð sem ég syng um í laginu. Ólafur Darri hefur alltaf verið í miklu uppáhaldi hjá mér og ég sá hann fyrir mér í hlutverkinu, en lét mig fyrst aðeins dreyma um að fá hann. Ég ákvað samt að bjalla í hann og senda honum plötuna. Hann svaraði strax og sagðist vera algjörlega til í þetta.“

En hvernig ætli Ólafur hafi staðið sig?

„Mér fannst hann ekki þurfa að leita langt. Hann fílaði sig mjög vel,“ segir Ingi. „Við erum að klippa myndbandið núna og ég held að allir séu svakalega ánægðir.“ - afb