Sexí túba og það sem hverfur

Vetrarjazzinn heldur áfram um helgina með spennandi og fjölbreyttri kvölddagskrá á Café Kúltúru. Þeir sem koma fram eru Hljómsveit Kristjönu Stefánsdóttur, Fönksveinar og B3 tríóið í kvöld og Tríó Eyþórs Gunnarssonar og ungir sólistar undir dyggri handleiðslu Andrésar Þórs og hljómsveitar spreyta sig annað kvöld.

Tvö af heitustu djassböndum Norðurlanda leika svo í Norræna húsinu kl. 17 í dag, tríóin Pelbo og Plop. Norska sveitin Pelbo er hljómsveit með óvenjulega hljóðfæraskipan, rödd, „sexí“ túbu og trommur! Tónlistin er að sama skapi óvenjuleg. Lifandi hljóðfærum er spyrnt saman við elektróník og óvægna sviðsframkomu og mun útkoman engu lík.

Finnska tríóið Plop er öllu hefðbundnara djasstríó. Þar er saxófónleikarinn Mikko Innanen í fararbroddi með öflugt riþmapar að baki. Plop hefur starfað í þrjú ár og leitar hins gullna jafnvægis á milli fyrirfram ákveðinna tónsmíða og þeirra sem fæðast á sviðinu.

Í tilefni af útkomu geisladisksins „Það sem hverfur“ verður svo efnt til tónleika í Þjóðmenningarhúsinu kl. 20 á sunnudagskvöldið. Ný tónlist Sigurðar Flosasonar við eyðibýlaljóð Aðalsteins Ásbergs Sigurðssonar verður flutt, en efnið kom út á samnefndum geisladiski í nóvember. Þetta er dramatísk tónlist þar sem djass, popp, sígild tónlist og þjóðleg stef renna saman og skapa bræðing sem hæfir efninu vel. Flytjendur eru söngvararnir Ragnheiður Gröndal og Egill Ólafsson, Sigurður Flosason á ýmis blásturshljóðfæri, Kjartan Valdemarsson á píanó og hljómborð og Matthías Hemstock á trommur, trommuheila og náttúruhljóð.

- drg