Fótbolti

Sigur á Ungverjum kæmi Íslandi líka nær HM í Katar

Sindri Sverrisson skrifar
Aron Einar Gunnarsson landsliðsfyrirliði er öllum hnútum kunnugur í Katar.
Aron Einar Gunnarsson landsliðsfyrirliði er öllum hnútum kunnugur í Katar. vísir/hulda margrét

Þó að leikur Íslands og Ungverjalands annað kvöld snúist um það hvort liðanna kemst í lokakeppni EM þá felur sigur líka í sér aukna möguleika á að komast á HM í Katar eftir tvö ár.

Framundan eru þrír leikir á einni viku hjá landsliðum Evrópu. Þetta eru síðustu leikirnir sem telja inn á næsta heimslista FIFA. Sá listi ræður því í hvaða styrkleikaflokkum lið verða þegar dregið verður til undankeppni HM í Katar þann 7. desember næstkomandi.

Ísland er í 22. sæti Evrópuþjóða á heimslistanum, og verður að óbreyttu í 3. styrkleikaflokki þegar dregið verður í undankeppni HM. Löndin í sætum 11-20 verða í 2. styrkleikaflokki og þangað vilja okkar menn komast.

Barátta við Slóvakíu og Írland

Ísland er rétt fyrir neðan Slóvakíu og Írland og á því möguleika á að komast upp í 2. styrkleikaflokk, með góðum úrslitum gegn Ungverjalandi og svo gegn Danmörku og Englandi í Þjóðadeildinni.

Ísland hækkaði sig upp um 4 stig með því að vinna Rúmeníu en tapa fyrir Danmörku og Belgíu í síðasta mánuði, og er með 1.461 stig. Slóvakía er með 1.466 og Írland 1.467.

Staða Evrópuþjóða á heimslistanum. Ísland er með 1.461 stig og gæti mögulega komist upp í 20. sæti, og þar með í 2. styrkleikaflokk fyrir HM-dráttinn.uefa.com

Leikurinn við Ungverjaland hefur mest vægi, þar sem að sá leikur er í undankeppni stórmóts. Sigur í venjulegum leiktíma myndi skila Íslandi um 12 stigum, og sigur í vítaspyrnukeppni myndi skila tæplega 6 stigum.

Ísland þyrfti væntanlega einnig að ná hagstæðum úrslitum gegn Danmörku og Englandi, til að komast upp fyrir Slóvakíu og Írland, og treysta á að þeim gangi ekki nægilega vel í sínum leikjum. Sigur gegn Ungverjalandi og Danmörku, en tap gegn Englandi, myndi gróft áætlað til að mynda skila Íslandi um 17 stigum og kæmi liðinu í álitlega stöðu.

Danmörk er að sama skapi í baráttu um að halda sér í hópi tíu efstu þjóða heimslistans, svo liðið verði í efsta styrkleikaflokki fyrir HM-dráttinn.

Eins og fyrr segir verður dregið í undanriðla fyrir HM 7. desember. Undankeppnin fer svo öll fram á næsta ári en þrír leikdagar eru í mars, þrír í september, tveir í október og tveir í nóvember. Efsta lið hvers riðils kemst á HM í Katar en liðin í 2. sæti fara í umspil.

Leikur Ungverjalands og Íslands verður sýndur í beinni útsendingu á Stöð 2 Sport 2 fimmtudaginn 12. nóvember klukkan 19.45 en upphitun hefst klukkan 18.45. Áskrift er hægt að kaupa hér en einnig verður í boði að kaupa stakan viðburð á myndlyklum Vodafone og Símans á kr. 990, sem og í vefsjónvarpi Stöðvar 2.


Tengdar fréttir

Ferðadagur hjá íslenska landsliðinu

Íslenska karlalandsliðið í knattspyrnu færir sig í dag yfir til Ungverjalands eftir stuttar æfingabúðir í Þýskalandi síðustu daga.

Uppselt á Ungverjaleikinn en enginn mætir

Þeir 20 þúsund miðar sem settir voru í sölu á úrslitaleik Ungverjalands og Íslands, um sæti á EM karla í fótbolta, seldust fjótt upp. Nú er hins vegar ljóst að engir áhorfendur verða á leiknum.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.