Lífið

Joe Rogan gagn­rýndur fyrir við­tal við sam­særis­kenninga­smið

Sylvía Hall skrifar
Samsæriskenningasmiðurinn Alex Jones var gestur í þætti Joe Rogan fyrr í vikunni.
Samsæriskenningasmiðurinn Alex Jones var gestur í þætti Joe Rogan fyrr í vikunni. Youtube

Hlaðvarpsstjórnandinn vinsæli Joe Rogan hefur sætt mikilli gagnrýni vegna viðtals við Alex Jones, stofnanda samsæriskenningamiðilsins Infowars og þáttastjórnanda The Alex Jones Show. Þættir Jones voru fjarlægðir af Spotify árið 2018 vegna hatursorðræðu og gerðu Facebook og Apple slíkt hið sama.

Þátturinn sem um ræðir er um það bil þrjár klukkustundir að lengd. Þar ræðir Jones meðal annars um kórónuveirufaraldurinn, ágæti grímunotkunar í baráttunni við hann sem og mögulega skaðsemi bóluefna. Rogan kannaði sannleiksgildi margra fullyrðinga Jones á meðan þættinum stóð.

Jones hefur verið þekktur fyrir samsæriskenningar sínar, en hann hefur til að mynda sett fram samsæriskenningar um árásina á Tvíburaturnana árið 2001 og skotárásina í Sandy Hook-grunnskólanum árið 2012. Hefur hann ítrekað haldið því fram að árásin hafi verið sviðsett, en foreldrar barna sem voru skotin til bana lögsóttu hann fyrir ærumeiðingar vegna þessa.

Þá hefur Facebook flokkað Jones sem öfgmann sem brjóti gegn skilmálum Facebook um „hættulega einstaklinga“.

Hlaðvarp Rogan er eitt það vinsælasta í heiminum um þessar mundir. Þar fær hann til sín fólk í lengri viðtöl og hefur hann rætt við marga af þekktustu listamönnum og stjórnmálamönnum heims. Fyrr á árinu skrifaði Rogan svo undir samning við Spotify fyrir hundrað milljónir Bandaríkjadala og munu þættir hans eingöngu vera aðgengilegir þar frá og með næsta ári.

Á vef breska ríkisútvarpsins segir að mörgum þyki skjóta skökku við að Spotify leyfi þáttinn í ljósi þess að Jones hafi verið bannaður áður. Með því að birta þáttinn séu bæði Spotify og Rogan að græða á því að gefa manni með öfgafullar jaðarskoðanir pláss í umræðunni.

Rogan svaraði gagnrýninni á Instagram-síðu sinni, sagði gagnrýnina vera fyrirsjáanlega og varði nokkrar fullyrðingar Jones. „Ég vissi að fólk myndi gagnrýna efnistök þáttarins án þess að hlusta og ég hafði rétt fyrir mér.“

View this post on Instagram

I knew people were going to criticize the content of the podcast without even listening and I was right. That’s why I fact checked every single crazy thing he said, and all of them were verified. People have said he spread “anti-covid vaccine conspiracy theories” because he said that 80% of the people who were given one of the vaccines got sick. Here’s the video of Bill Gates admitting it himself. Now, I’m NOT anti vaccine, and if a safe and effective covid vaccine is created I’ll take it and encourage others to take it, but I wanted to put this video up to validate what he said. He said a lot of crazy, but accurate things, and that’s what I’ve been saying about him for years. He’s most certainly fucked up in the past, but this episode and the subjects he exposed highlight why I chose to have him on.

A post shared by Joe Rogan (@joerogan) on

„Hann sagði mikið af klikkuðum, en réttum hlutum, og það er það sem ég hef sagt um hann í mörg ár. Hann hefur svo sannarlega klúðrað áður, en þessi þáttur og þau málefni sem hann einblíndi á undirstrikuðu hvers vegna ég ákvað að fá hann í þáttinn.“

Daniel Ek, framkvæmdastjóri Spotify, sagði í yfirlýsingu að fyrirtækið skipti sér ekki af því hverjum væri boðið í þætti streymisveitunnar. Þau vildu fyrst og fremst að fjölmiðlamenn hugsuðu um að skapa efni fyrir hlustendur, þó þau færu vissulega yfir hvað væri birt. Ef það samræmdist ekki skilmálum Spotify yrði það ekki birt.

Viðtalið má sjá hér að neðan. 




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.