„Við viljum þetta meira en allt“

Birkir Bjarnason hefur ekki áhyggjur af því að leikmenn íslenska landsliðsins séu orðnir svo gamlir að þeir myndu eiga erfitt með að höndla álagið af því að spila aftur í lokakeppni stórmóts.

Birkir ræddi við Vísi í hádeginu í dag en þá var ekki orðið ljóst að starfsmaður KSÍ hefði greinst með kórónuveirusmit, og að Erik Hamrén og allt starfsliðið í kringum landsliðið þyrfti að fara í sóttkví. Leikmenn hafa ekki verið settir í sóttkví og enn stendur til að leikurinn við Belgíu annað kvöld fari fram.

Ísland er einum leik (gegn Ungverjalandi 12. nóvember) frá því að komast á EM næsta sumar. Í yfirstandandi landsleikjatörn hefur sýnt sig, eins og síðustu misseri, að leikmennirnir sem komu Íslandi á tvö stórmót eru orðnir „brothættari“ þegar horft er til meiðsla.

Þannig valda gömul og ný meiðsli því að Alfreð, Jóhann Berg, Kári og Ragnar, og einnig hinn ungi Arnór Sigurðsson, geta ekki spilað gegn Belgíu annað kvöld í Þjóðadeildinni.

„Þetta hefur verið umræðan síðustu ár, að við séum að verða svolítið gamlir. Að mínu mati er samt kjarninn í þessu liði ekki of gamall. Við erum í kringum þrítugt og ættum að vera á okkar besta aldri,“ segir Birkir. Draumurinn er skýr um að komast á EM:

„Vissulega eru nokkrir aðeins eldri, en þú sérð samt mann eins og Kára Árnason sem er orðinn 38 ára en spilar gríðarlega vel með landsliðinu. Ég held að það verði aldrei nein spurning hvort að við verðum klárir. Við viljum þetta meira en allt.“

Ber fyrirliðabandið stoltur

Birkir mun, ef af leiknum verður, í fyrsta sinn leiða íslenska liðið inn á völlinn á morgun sem fyrirliði, í leiknum erfiða við Belgíu sem er í efsta sæti heimslistans.

„Ég er náttúrulega stoltur af því að bera fyrirliðabandið en þetta verður bara eins og hver annar leikur fyrir mér,“ segir Birkir.

Til viðbótar við þá fimm sem nefndir eru að ofan og verða ekki með á morgun, eru Gylfi Þór Sigurðsson og Aron Einar Gunnarsson farnir heim. Enn á ný vantar því fjölda leikmanna í leik gegn Belgíu, sem sýnt hefur yfirburði sína í fyrri leikjum gegn Íslandi.

Synd að geta ekki mætt þeim bestu með okkar besta lið

„Þetta hefur verið svolítið þannig síðustu ár, sem er synd. Við erum að mæta hérna sterkustu þjóðum í heimi og þá væri best að vera með sitt besta lið. Aftur á móti er þetta gott tækifæri fyrir aðra til að sýna sig og það eru margir sem hafa gert það,“ segir Birkir.

„Við þekkjum Belga mjög vel eftir að hafa spilað mikið við þá síðustu ár. Við vorum ekki sáttir síðast [5-1 tap ytra í september], fengum á okkur allt of mikið af mörkum og ætlum okkur að gera betur. Það er kostur að vera hér heima á Laugardalsvelli í kuldanum. Við reynum að gera okkar besta og ná í góð úrslit,“ segir Birkir. Hann segir það ekkert lykilatriði að Kevin De Bruyne og Eden Hazard missi af leiknum:

„Ég held að það skipti ekkert rosalega miklu máli. Það koma gríðarlega góðir leikmenn inn í þeirra stað og þetta verður alltaf gríðarlega sterkt lið sem við mætum.“