Fótbolti

Sveindís kemur mjög vel inn í okkar hóp

Sindri Sverrisson skrifar
Guðný Árnadóttir, Dagný Brynjarsdóttir, Sveindís Jane Jónsdóttir og Barbára Sól Gísladóttir teygja sig og fetta á landsliðsæfingu.
Guðný Árnadóttir, Dagný Brynjarsdóttir, Sveindís Jane Jónsdóttir og Barbára Sól Gísladóttir teygja sig og fetta á landsliðsæfingu. VÍSIR/VILHELM

Jón Þór Hauksson, landsliðsþjálfari í fótbolta, segir nýliðann Sveindísi Jane Jónsdóttur hafa komið mjög vel inn í landsliðshópinn en gaf ekkert uppi um hvort hún myndi byrja leikinn gegn Lettlandi annað kvöld.

„Hún [Sveindís] er að sjálfsögðu ekki með reynsluna á bakvið sig í þessum efnum, nýliði í hópnum og hefur ekki spilað A-landsleik. En hún hefur staðið sig frábærlega með U19-landsliðinu og auðvitað í Pepsi Max-deildinni í sumar. Hún er virkilega spennandi og efnilegur leikmaður, sem kemur mjög vel inn í okkar hóp,“ sagði Jón Þór við Vísi í dag, en Sveindís hefur skorað 12 deildarmörk fyrir Breiðablik í sumar. Viðtalið má sjá hér að neðan.

Klippa: Sportpakkinn - Jón Þór fyrir leikinn við Letta

Ísland og Lettland eigast við á Laugardalsvelli kl. 18.45 á morgun, á Stöð 2 Sport, og á þriðjudaginn tekur Ísland á móti Svíþjóð. Leikirnir eru í undankeppni EM og hafa Ísland og Svíþjóð unnið alla þrjá leiki sína til þessa, en Lettland tapað sínum þremur.

Dagný Brynjarsdóttir meiddist í leik með Selfossi á dögunum en er klár í slaginn eins og allir aðrir leikmenn íslenska liðsins sem æfði í hádeginu.

„Það eru allir leikmenn tilbúnir og ég er virkilega ánægður með andann og stemninguna í hópnum. Við erum með alla leikmenn ferska og það er mikið sjálfstraust í hópnum. Það hefur gengið framúrskarandi vel í þessu verkefni hingað til og við vonumst til að taka það með okkur í leikinn á morgun. Við erum bjartsýn,“ sagði Jón Þór.

Jón Þór Hauksson fylgist með leikmönnum á æfingu á Laugardalsvelli í vikunni.VÍSIR/VILHELM

Landsliðsþjálfarinn kvaðst ekki hugsa neitt til toppslagsins við Svía þessa stundina – nú væri öll einbeiting á leiknum við Letta. Hann vildi sömuleiðis ekki dvelja mikið við þá staðreynd að ekki aðeins væri nauðsynlegt að vinna Lettland á morgun, heldur gæti reynst afar dýrmætt að vinna stóran sigur. Ekki bara í baráttunni við Svíþjóð um toppsætið. Þrjú lið, í undanriðlunum níu, með bestan árangur í 2. sæti komast nefnilega beint á EM.

„Það skiptir máli í öllum fótbolta að skora mörk og það er ekkert öðruvísi í þessum leik en öðrum. Markatalan getur vissulega skipt máli í þessum riðli en það eru fyrst og fremst stigin sem við þurfum að byrja á að ná okkur í. Við erum með fullt hús stiga og viljum hafa það þannig áfram.“

„Krefjandi fyrir mig“

Jón Þór var rekinn upp í stúku í síðasta leik Íslands í undankeppninni, sem var einmitt gegn Lettlandi 8. október í fyrra, fyrir að brúka kjaft við dómarann. Því tekur hann út leikbann á morgun.

„Dagskráin er hefðbundin hjá mér á leikdegi þangað til að klukkutími er til leiks en þá má ég engin afskipti hafa af liðinu. Það í sjálfu sér riðlar ekki okkar undirbúningi fyrir leikinn. Þetta snýst allt um að leikmennirnir hafi þá umgjörð og aðbúnað sem þeir þurfa, og við erum með mjög öflugt teymi þjálfara og starfsfólks í kringum liðið sem gerir það að verkum að þetta verður allt í toppstandi á morgun,“ sagði Jón Þór. Hann verður á Laugardalsvelli, en fjarri sínu liði og má ekkert við það tala.

Íslenska landsliðið á æfingu á Laugardalsvelli í vikunni, að undirbúa sig fyrir leikina mikilvægu við Lettland og Svíþjóð.VÍSIR/VILHELM

„Þetta er auðvitað verst fyrir mig, og verður erfitt og krefjandi fyrir mig persónulega. En það mun ekki bitna á liðinu eða frammistöðu þess í leiknum. Við erum auðvitað búin að undirbúa liðið, planið er klárt, og ég má engin skilaboð senda eða hafa afskipti af liðinu niðri á velli. Við erum vanir að vinna saman og vitum hvernig við hugsum leikina,“ sagði Jón Þór. Það jákvæða í þessu er þá kannski helst að hann getur nú blótað dómaranum í friði?

„Já, ég hef nú haft ár í að reyna að taka á þeim málum, þannig að ég er klár í þann slag þegar ég stíg til baka,“ sagði Skagamaðurinn og brosti.


Tengdar fréttir

Svarið við vandræðastöðunni er frá Selfossi

Bára Kristbjörg Rúnarsdóttir, sérfræðingur Pepsi Max marka kvenna, segir að Selfyssingurinn Barbára Sól Gísladóttir hafi alla burði til að verða framtíðar hægri bakvörður íslenska landsliðsins.




Fleiri fréttir

Sjá meira


×