Annalísa Hermannsdóttir setti saman föstudagslagalista Vísis að þessu sinni.
Hún gerir draumkennt rafpopp og gefur það út undir eiginnafni sínu. Fyrr í vikunni kom út stuttskífan 00:01, en hún er það fyrsta sem Annalísa sendir frá sér.
Eins og gefur að skilja vegna tíðinda vikunnar er lítið um tónleikahald á döfinni hjá henni eins og fleirum, að undanskildum litlum lokuðum sveitatónleikum um helgina.
„Þessi playlisti er bara stuð og stemmning, ég ætla að hlusta á hann á meðan ég keyri upp í bústað á eftir - held að hann sé mjög góður undir stýri,“ sagði Annalísa aðspurð um lagavalið og lagði jafnframt áherslu á að best væri að hlusta á hann í réttri röð.
