Sara Björk Gunnarsdóttir gæti leikið sinn fyrsta leik fyrir stórlið Lyon þegar það mætir Bayern München þann 22. ágúst í Meistaradeild Evrópu í fótbolta.

Óvissa ríkti um það hvort Sara fengi að spila í keppninni með Lyon eftir að hafa spilað fyrir Wolfsburg í vetur og komist með liðinu í 8-liða úrslitin. UEFA hefur hins vegar ákveðið að vegna þess að keppnin dróst á langinn, vegna kórónuveirufaraldursins, megi félög skrá allt að sex nýja leikmenn fyrir lokakaflann núna í ágúst. Að hámarki þrír þessara leikmanna mega hafa spilað fyrir annað lið sem er með í 8-liða úrslitunum, eins og í tilviki Söru.

Úrslitin í Meistaradeildinni áttu að ráðast í vor en voru færð fram í ágúst vegna faraldursins. Átta lið standa eftir og spila í Bilbao og San Sebastián á Spáni frá 21.-30. ágúst. Leiknir verða stakir leikir í 8-liða úrslitum og undanúrslitum, í stað tveggja leikja eins og vaninn er.

Lyon mætir Bayern í 8-liða úrslitunum og með sigri fær liðið leik við Arsenal eða PSG í undanúrslitum. Sara gæti því mögulega mætt sínu gamla liði Wolfsburg í úrslitaleiknum 30. ágúst.

Sara er ein af fjölda leikmanna sem skipt hafa um lið í sumar eftir að samningar þeirra runnu út 30. júní. Í sumum tilvikum tókst félögum reyndar að framlengja samninga um tvo mánuði, en þessi staða varð til þess að UEFA gerði tímabundna breytingu á reglum sínum til að tryggja að sem flestar af bestu knattspyrnukonum heims yrðu með á lokastigum Meistaradeildarinnar.

Lyon náði að framlengja samninga við enska tvíeykið Lucy Bronze og Alex Greenwood um tvo mánuði, og félagið hélt þeim Söruh Bouhaddi og Dzsenifer Marozsán sem virtust vera á leið til Bandaríkjanna. Þá hafa þær Sara, ástralski varnarmaðurinn Ellie Carpenter, markvörðurinn Lola Gallardo og bakvörðurinn Sakina Karchaoui bæst í hópinn. Aðeins tvær þeirra, Sara og Carpenter, koma frá félögum sem enn eru með í keppninni og Sara mun því geta leikið með Lyon. 

Vinni Wolfsburg keppnina mun Sara hafa átt sinn þátt í því en hún lék þrjá leiki með liðinu í Meistaradeildinni síðasta haust og skoraði eitt mark. Hún hefur þegar orðið þýskur meistari og bikarmeistari með liðinu, fjórða árið í röð, nú í sumar.