Ancelotti: Vorum mjög nálægt því að vinna

Carlo Ancelotti, stjóri Everton, var virkilega ánægður með frammistöðu síns liðs í markalausu jafntefli gegn Liverpool í ensku úrvalsdeildinni í dag.

Leikurinn var afar bragðdaufur en Everton fékk bestu færi leiksins.

„Við vorum mjög nálægt því að vinna en þetta var hörkuleikur og erfiður leikur,“ sagði Ancelotti í leikslok.

„Við spiluðum mjög góðan leik. Við vorum einbeittir og tilbúnir til að fórna okkur fyrir liðið. Svo fengum við færin í lokin.“

„Liverpool spilaði góðan leik. Þeir voru meira með boltann en við vorum mjög góðir varnarlega,“ sagði Ancelotti sem tók við stjórnartaumunum hjá Everton í lok síðasta árs.