David Luiz á leið til Benfica þegar samningur hans við Arsenal rennur út

Hinn 33 ára gamli David Luiz gæti verið á förum frá Arsenal þegar samningi hans við félagið lýkur í sumar. Samkvæmt erlendum fréttamiðlum er Benfica næsti áfangastaður hins hárprúða Brasilíumanns.

Luiz lék með Benfica frá 2007 til 2011 en þaðan fór hann til Chelsea, Paris-Saint Germain, aftur til Chelsea og loks til Arsenal. Hefur hann orðið bæði Englands- og Frakklandsmeistari ásamtþví að vinna Meistaradeild Evrópu með Chelsea árið 2012.

Luiz hefur ekki átt sjö dagana sæla hjá Arsenal og hefur hann oft verið gagnrýndur fyrir glæfralegan leikstíl.

Í viðtali í apríl á þessu ári sagði varnarmaðurinn að hann hefði alltaf viljað ljúka ferlinum hjá Benfica og það virðist sem hann fái ósk sína uppfyllta.