Fótbolti

Ýta launamál Skagamanna undir heimkomu Harðar Inga?

Runólfur Trausti Þórhallsson skrifar
Guðmundur, Freyr og Hjörvar fara yfir málin og mögulegar launalækkanir í íþróttaheiminum.
Guðmundur, Freyr og Hjörvar fara yfir málin og mögulegar launalækkanir í íþróttaheiminum. Skjáskot/Sportið í kvöld

Í þætti gærkvöldsins af Sportið í kvöld voru launalækkanir í íþróttaheiminum til umræðu. Þá sérstaklega í kringum ÍA en fréttir bárust í gær að laun hefðu verið tekin af leikmönnum án samþykkis þeirra.

ÍA gaf í kjölfarið út yfirlýsingu þess efnis að unnið verði í málinu í góðri sátt við leikmenn félagsins.

„Held að við séum að fara fá fréttir um þetta frá fleiri félögum. Ég veit að lið eru að reyna lækka laun leikmanna, þjálfara og allra í kringum félögin. Sáum bara fréttir um það í dag að leikmenn ÍA væru ósáttir,“ sagði Guðmundur Benediktsson, þáttastjórnandi, en með honum voru Freyr Alexandersson og Hjörvar Hafliðason að þessu sinni.

Sportið í kvöld er á dagskrá Stöðvar 2 Sports á þriðjudags-, miðvikudags- og fimmtudagskvöldum klukkan 20.00. Upptökur af fyrri þáttum má nálgast á sjónvarpsvef Stöðvar 2. Stöð 2 Sport er hluti af Sportpakkanum.

Umræðuna í heild sinni má sjá í spilaranum neðst í fréttinni.

„Það þarf að nálgast viðfangsefnið þannig að það sé „samtal“ og allir séu upplýstir. Held að það sé mögulega mikilvægara en aldrei fyrr,“ sagði Freyr Alexandersson varðandi það að félögin þyrftu að upplýsa leikmenn og þjálfara um nákvæmlega hvað sé í gangi.

„Ég skil að Freyr komi úr Laugardalnum og þurfi að tala eins og pólitíkus en þegar ég horfi á Skagann þá voru þeir reknir með rosalegu tapi í fyrra. Samt voru þeir að ná í Sindra Snæ Magnússon frá ÍBV og Aron Kristófer Lárusson frá Þór Akureyri á miðju tímabili. Þegar þeir sáu í hvað stefndi,“ sagði Hjörvar áður en Gummi greip inn í.

„Ég velti fyrir mér þegar ég sá þessar tölur [60 milljón króna tap], sem komu út í kringum ársþing KSÍ frá Skagamönnum, hvernig gæti staðið á þessu og fyrsta sem mér datt í hug – og ég hef ekkert fyrir mér í þessu – er að þeir taka Tryggva Hrafn Haraldsson til baka. Hvort það hafi greiðslur átt eftir að koma frá Halmstad, þar sem Tryggvi Hrafn var, sem komu þar af leiðandi ekki hafi reiknast inn í bókhaldið sem tap,“ sagði Guðmundur um þennan mikla halla á rekstri ÍA.

„Það er ekki svo stórt tap að það er í tugum milljóna,“ svaraði Freyr.

Að lokum tók Hjörvar þó upp hanskann fyrir ÍA.

„Raunveruleiki Skagamanna er raunveruleiki fótboltamanna um allan heim. Arnór Sigurðsson, leikmaður CSKA Moskvu, er upp á Skaga núna og hann er eflaust að segja þeim frá því að það sé búið að taka helminginn af launum hans. Svona í takt við það sem er að gerast allstaðar.“

Hjörvar endaði svo með því að benda á að eflaust ýtti þetta undir það að Hörður Ingi Gunnarsson bakvörður ÍA, fari aftur í uppeldísfélag sitt FH.  Skagamenn hafa nú þegar neitað tilboði Hafnfirðinga í þennan unga og efnilega bakvörð.

Alveg í lokin barst svo umræðan út í mikilvægi yngri flokka þjálfara og þeirra hlutverk í mótun ungra barna sem stunda íþróttir.

Umræðuna um launalækkanir í íþróttaheiminum má sjá í heild sinni í spilaranum hér að neðan.

Klippa: Launalækkanir

Tengdar fréttir

Segir stöðu knattspyrnuþjálfara þunga

Birgir Jónasson, gjaldkeri Knattspyrnuþjálfarafélags Íslands, segir að félögin geti ekki einhliða ákveðið það að draga niður þjálfara í launum. Það þurfi að taka samtalið og ákveða þetta í sameiningu.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.