Stendur við ummælin

Hannes Hólmsteinn Gissurarson prófessor segir að hann standi við orð sín um Jón Ólafsson og bendir í því sambandi á umfjöllun Morgunpóstsins frá árinu 1995 þar sem Jón var bendlaður við fíkniefnamisferli. „Lykilsetningin í ummælum mínum um Jón Ólafsson er einmitt: Það hefur verið fullyrt,“ segir Hannes. Hann segir það rangt sem fram hefur komið að hann hafi ekki beðið um að heimasíðu sinni yrði lokað fyrr en í september 2004. „Ég sendi háskólanum tölvupóst þann 3. júlí árið 2004 þess efnis að loka ætti heimasíðunni minni. Ég á afrit af þessum gögnum,“ segir Hannes. Fram kom í enskum dómi sem féll í meiðyrðamáli Jóns Ólafssonar kaupsýslumanns gegn Hannesi að heimasíða hans hafi innihaldið meiðyrði um Jón allt til þessa árs. „Þetta er grafalvarlegt mál því það er verið að reyna að hafa af mér tólf milljónir,“ segir Hannes.