Leiðtogi uppreisnarmanna í Burma drepinn

Leiðtogi stærsta uppreisnarhóps í Burma var skotinn til bana á heimili sínu í bænum Mae Sot í Taílandi sem liggur við landamæri Burma í dag. Eiginkona Pado Mahn Sha Lar Phan sagði Reuters fréttastofunni að hann hefði verið skotinn af tveimur mönnum sem komu í jeppa að heimili þeirra. Lar Phan lést samstundis.

Hann var framkvæmdastjóri Karen National samtakanna. Í viðtali við Reuters síðastliðinn mánudag spáði hann fyrir um aukið ofbeldi í landinu fyrir stjórnarskrárkosningar í landinu í maí.

Meðlimir KNU sögðu fréttastofu CNN að þeir teldu herforingjastjórnina á bakvið morðið. Stjórnin hefur hins vegar sakað hópinn um árásir til að veikja herinn.