Svíi handtekinn í Frakklandi grunaður um hryðjuverk

Tuttugu og þriggja ára sænskur maður hefur verið handtekinn í Frakklandi, grunaður um að tilheyra hryðjuverkahópi sem starfaði í Sómalíu.

Eftir því sem fram kemur á vef sænska blaðsins Expressen var maðurinn gripinn þegar hann hugðist fljúga frá París til Svíþjóðar í upphafi mánaðarins og situr hann nú í varðhaldi.

Maðurinn er grunaður um að tilheyra hryðjuverkahóp sem nefndist Gergis-sellan og var mynduð af ungum mönnum með rætur í borginni Gergis í Túnis. Hópurinn mun hafa haldið til Sómalíu og barist þar með uppreisnarhópum sem sagðir eru hafa tengsl við al-Qaida samtökin.

Þegar eþíópíski herinn réðst inn í Sómalíu í lok árs 2006 flýði hann til Jemen og þaðan til Sádi-Arabíu þar sem vinur hans hjálpaði honum að verða sér úti um sænskt vegabréf. Vinir hans, sem sitja í fangelsi í Eþíópíu, munu svo hafa sagt til hans samkvæmt Expressen.