Jórunn Viðar með lag á Medulla

"Það er búið að syngja þetta lag sundur og saman og sérstaklega hefur fólk rifið það í sig í Söngskólanum í Reykjavík," segir tónskáldið Jórunn Viðar um lag sitt Vökuró en lagið sem hefur verið sungið af mörgum stórsöngvurum í gegnum tíðina er nú að finna á nýjustu plötu Bjarkar Guðmundsdóttur. "Ég fékk beiðni frá Ásmundi í Smekkleysu um hvort Björk mætti syngja lagið á nýrri plötu, svo hringdi hún í mig eftir að lagið var tilbúið og spurði mig hvernig mér líkaði. Ég gaf henni þá samþykki mitt enda fer Björk afskaplega vel með lagið," segir Jórunn sem er sérstaklega ánægð með endinn á laginu hjá Björk. "Það skiptir miklu máli hvernig lagið endar því það er svo mikill stígandi í þessu fallega ljóði Jakobínu og endirinn er alveg grátsætur. Mér finnst líka ótrúlegt að Björk notist eingöngu við raddir í laginu því þegar maður hlustar á lagið finnst manni eins og notast sé við hljóðfæri." Jórunn segist sérstaklega muna eftir Vökuró í flutningi Þuríðar Pálsdóttur. "Þuríður sagði alltaf á sínum tíma að þetta væri uppáhaldslagið hennar og það er svolítið gaman að bera lagið saman í meðferð hennar og Bjarkar því þær eru svo ólíkar söngkonur." Jórunn nam tónsmíðar við Julliard-tónlistarskólann í New York á árunum 1943-45 og á að baki glæstan tónlistarferil. Björk hefur, eins og margir af hennar kynslóð, alist upp við lög hennar en meðal þekktustu laga Jórunnar eru Krummavísur, Mamma ætlar að sofna, Krumminn á skjánum, Kall sat undir kletti og jólalagið Það á að gefa börnum brauð. Þrátt fyrir að vera löngu komin á eftirlaunaaldurinn er hin áttatíu og fimm ára gamla Jórunn langt frá því að vera hætt að semja lög. "Ég er alltaf að semja. Maður losnar aldrei út úr þessu tónafangelsi og er lokaður inn í þessum hring," segir Jórunn glöð í bragði en það hlýtur að teljast mikill heiður fyrir hana að fá að vera með lag á plötu hjá einum heitasta tónlistarmanni heims. "Mér finnst gaman að ég hafi komið að gagni og er ánægð með að Björk hafi tekið mig með þrátt fyrir að ég sé svona miklu eldri en hún."