Metnaðurinn hvarf

Strákasveitin, eða kannski karlasveitin, Westlife missti metnaðinn fyrir því sem hún var að gera og ákvað þess vegna að slíta samstarfinu.

Þetta kemur fram í viðtali við sveitarmeðlimi í breska blaðinu Daily Mail.

„Sem hljómsveit en ekki sem einstaklingar misstum við bara metnaðinn,“ hefur Daily Mail eftir Nicky Byrne. „Um leið og hungrið hverfur verður þú að horfast í augu við sjálfan þig og taka ákvörðun eins og alvörumaður.“

Kian Egen og Byrne útiloka ekki að Brian McFadden, sem yfirgaf sveitina 2004, snúi aftur og syngi með sveitinni á síðustu tónleikaferðinni. „Hann verður alltaf klikkaður í mínum huga,“ segir Kian við Daily Mail. „En hann er frábær manneskja og mér þykir vænt um hann. Þegar hann yfirgaf okkur fannst mér eins og hann fengi aldrei að snúa aftur. Hann gat aldrei hugsað sér að láta fjóra aðra stráka segja sér fyrir verkum.“ Byrne bætir því við að ef McFadden snúi aftur verði það mjög sérstakt. „Við vonumst til að geta sungið með honum einn daginn.“