300. leikurinn hjá Birki í kvöld

Birkir Kristinsson, fyrirliði og markvörður ÍBV í Landsbankadeild karla í knattspyrnu, spilar sannkallaðan tímamótaleik á Hásteinsvellinum í Vestmannaeyjum í kvöld því þessi 39 ára markvörður nær tveimur stórum áföngum á ferlinum þegar Eyjamenn taka á móti Grindvíkingum í 10.umferð. Það er ekki nóg með það að þetta sé 300. leikur Birkis í efstu deild því þessi leikur er einnig hans 100. fyrir Eyjaliðið í úrvalsdeild. Birkir verður í kvöld ennfremur fyrstur í sögunni til að spila 300 leiki í efstu deild á Íslandi sem er mikið afrek í deild þar sem aðeins eru spilaðir 18 leikir á hverju ári. Birkir hefur spilað alla leiki Eyjaliðsins síðan hann kom til félagsins fyrir tímabilið 1999. Birkir hefur í raun ekki misst úr leik frá árinu 1985 þegar tekin eru inn í myndina ár sem hann hefur spilað hér á landi en hann spilaði 198 leiki í röð áður en hann fór út í atvinnumennsku til Noregs 1996. Birkir hefur þegar því spilað 16 heil tímabil (18 leikir) og er þegar á góðri leið með því að bæta því sautjánda við í sumar. Leikjametið hans Gunnars Oddssonar, frá 2001, féll í fimmtu umferð og það verður að teljast ólíklegt að meti Birkis verði ógnað í framtíðinni. Það er ekki nóg með að það þurfi að spila að minnsta kosti 17 heil tímabil því Birkir er hvergi nærri hættur og ef marka má frammistöðuna í sumar á hann nóg eftir. Birkir er auk þess leikjahæsti íslenski landsliðsmarkvörðurinn frá upphafi með 73 landsleiki, 32 leikjum meira en næsti maður sem er Bjarni Sigurðsson með 41 leik. Árni Gautur Arason hefur spilað 37 landsleiki og á því enn 36 leiki í að jafna met Birkis. Birkir lék sinn fyrsta leik í efstu deild með liði KA á Akureyrarvelli 22. júní 1984 þegar Blikar komu í heimsókn. Breiðablik vann leikinn 1-0. Birkir spilaði einnig næsta deildarleik gegn Fram en varð síðan fyrir því að fótbrotna í bikarleik gegn Val og spilaði því ekki meira sumarið 1984. Birkir gekk til liðs við Skagamenn fyrir tímabilið 1985 og spilaði þar næstu þrjú ár allt þar til að hann fór til Fram. Birkir lék síðan með Fram í átta ár eða þar til að liðið féll sumarið 1995. Frá 1996 til 1998 var Birkir í atvinnumennsku með Brann í Noregi og Norrköping í Svíþjóð en snéri síðan til æskuslóðanna í Vestmannaeyjum 1999 þar sem hann hefur spilað síðan við mjög góðan orðstír. Hægt er að hlusta á viðtal við Birki úr eittfréttum Bylgjunnar með því að smella á hlekkinn sem fylgir fréttinni. Leikir Birkis með einstökum félögum í efstu deild: KA (1984) 2 leikir / 3 mörk á sig  ÍA (1985-1987) 54/ 72 Fram (1988-1995) 144/ 188 ÍBV (1999- ) 99/ 104 Úrslit í leikjum Birkis í efstu deild: Leikir 299 (99 með ÍBV) Sigurleikir 146 (45) Jafnteflisleikir 55 (24) Tapleikir 97 (30) Leikjametið í efstu deild: Birkir Kristinsson 299 Gunnar Oddsson 294  Sigurður Björgvinsson 267 Andri Marteinsson 246 Júlíus Tryggvason 243 Þormóður Egilsson 239 Heimir Guðjónsson 233 Pétur Ormslev 231 Sigursteinn Gíslason 229 Guðmundur Steinsson 228