Ole Gunnar jafnaði met Sir Alex í gær

Norðmaðurinn Ole Gunnar Solskjær og lærisveinar hans í Manchester United jöfnuðu í gær félagsmetið yfir flesta útisigra í röð.

Sigurinn á Chelsea á Stamford Bridge í gær var sjöundi útisigur liðsins í röð en Solskjær tók við af Jose Mourinho eftir 3-1 tap á móti Liverpool á Anfield.

Manchester United vann 5-1 útisigur á Cardiff City í fyrsta leik Ole Gunner Solskjær og hefur síðan unnið sex útileiki til viðbótar.

Liðið hefur haldið hreinu í fimm af þessum sjö leikjum og skorað í þeim sautján mörk eða 2,4 mörk að meðaltali í leik.

Ole Gunner Solskjaer continues to impress at Manchester United  pic.twitter.com/buypM7C1lz

— ESPN FC (@ESPNFC) February 19, 2019

Manchester United náði aðeins tvisvar sinnum að vinna sjö útileiki í röð í öllum keppnum í stjóratíð Sir Alex Ferguson frá 1986 til 2013. Fyrst náði United-liðið því árið 1993 og svo aftur níu árum síðar.

Útileikir Manchester United undir stjórn Ole Gunnar Solskjær:

22. desember 2018: 5-1 sigur á Cardiff í deild

2. janúar 2019: 2-0 sigur á Newcastle í deild

13. janúar 2019: 1-0 sigur á Tottenham í deild

25. janúar 2019: 3-1 sigur á Arsenal í bikar

3. febrúar 2019: 1-0 sigur á Leicester City í deild

9. febrúar 2019: 3-0 sigur á Fulham í deild

18. febrúar 2019: 2-0 sigur á Chelsea í bikar

7 sigrar í 7 leikjum

Markatalan er: +15 (17-2)