Leikmenn Chelsea fengu annan skell með jafntefli við unglingaliðið

Leikmenn Chelsea halda áfram að þola niðurlægingu en margar af stjörnum liðsins þurftu að sætta sig við jafntefli gegn unglingaliði félagsins eftir að hafa tapað 6-0 fyrir Manchester City.

Maurizio Sarri hélt liðsfund eftir tapið stóra og sendi svo varamennina úr leiknum, ásamt öðrum leikmönnum í aðalliðinu sem spiluðu ekki leikinn, út að spila við lið úr akademíu félagsins eftir því sem segir í frétt The Times.

Leikurinn var aðeins 60 mínútur og spilaður í fjórum leikhlutum í stað tveggja. Hann endaði með 3-3 jafntefli þar sem unglingarnir réðu vel við Willian, Olivier Giroud og fleiri stór nöfn.

Sarri horfði á megnið af leiknum og íhugar án efa að gera einhverjar breytingar á hópnum sem hann er með.

Mikil pressa er orðin á Sarri en Chelsea á annan stóran leik á mánudagskvöld þegar liðið mætir Manchester United í ensku bikarkeppninni. Fyrst spilar Chelsea þó við Malmö í Evrópudeildinni í kvöld.