„Gæti ekki beðið um meira frá Alli“

Jose Mourinho hrósaði Dele Alli í hástert eftir sigur Tottenham á Bournemouth í ensku úrvalsdeildinni í dag.

Tottenham vann 3-2 sigur á Bournemouth og hefur Jose Mourinho því unnið fyrstu þrjá leiki sína sem stjóri Tottenham.

Alli skoraði tvö af mörkum Tottenham og hefur hann blómstrað undir stjórn nýja stjórans.

„Ég þarf ekki að tala um Dele. Það er það besta sem gerist fyrir stjóra þegar þú þarft ekki að tala um leikmann því allir aðrir eru að því,“ sagði Mourinho eftir leikinn.

„Hann er að spila virkilega vel og ég gæti ekki beðið um neitt meira frá honum. Hann er að skora mörk, leggja upp og vinnuframlag hans er frábært.“