Jóhann Berg með tvær hjálparsendingar gegn Wigan

Jóhann Berg Guðmundsson átti þátt í báðum mörkum Burnley í 2-2 jafntefli við Wigan Athletic í æfingaleik í dag.

Á 5. mínútu léku Jóhann Berg og Ashley Barnes sín á milli áður en sá síðarnefndi sendi á Jay Rodríguez sem skoraði.

Sex mínútum síðar kom Jóhann Berg boltanum á Barnes sem sendi á Dwight McNeil sem skoraði.

Þessi góða byrjun dugði Burnley þó ekki til sigurs. Anthony Pilkington minnkaði muninn á 28. mínútu og um miðbik seinni hálfleiks jafnaði Joe Gelhardt fyrir Wigan. Lokatölur 2-2.

Jóhann Berg lék allan leikinn fyrir Burnley. Næsti leikur liðsins er gegn franska liðinu Nice á þriðjudaginn.