Guardiola: City mun þjást gegn Newport

Manchester City mun þjást gegn Newport í ensku bikarkeppninni í dag. Þetta segir Pep Guardiola, knattspyrnustjóri City.

Englandsmeistararnir fara til Wales í dag og mæta andstæðingi sem hefur nú þegar slegið eitt úrvalsdeildarlið úr leik.

Newport, sem spilar í D-deildinni, lagði bæði Leicester og Middlesbrough til þess að komast í fimmtu umferðina.

„Þeir eru stærri og sterkari en við. Þeir verða betri en við á sumum sviðum,“ sagði Guardiola.

„Þeir hafa staðið sig frábærlega í keppninni. Það sem þeir gera, þeir gera það mjög vel.“

Á síðasta ári komst City ekki framhjá fimmtu umferðinni, þá var það Wigan Athletic sem sló City úr leik. Wigan var í C-deildinni á síðasta tímabili.

„Þetta er bikarinn. Allt getur gerst og við munum taka þennan leik mjög alvarlega.“