Leikmenn Man. City velja næsta fyrirliða liðsins

Pep Guardiola, knattspyrnustjóri Englandsmeistara Manchester City, ætlar að leyfa leikmönnum liðsins að velja næsta fyrirliða þess.

Vincent Kompany, sem var fyrirliði City í átta ár, yfirgaf félagið eftir síðasta tímabil.

„Leikmennirnir velja fyrirliðann. Þegar allir eru komnir til baka halda þeir fund og ákveða hver verður fyrirliði,“ sagði Guardiola.

David Silva var fyrirliði City í sigrinum á West Ham United, 4-1, í Kína í gær.

Spánverjinn, sem er að hefja sitt síðasta tímabil hjá City, var fyrirliði í nokkrum leikjum í fyrra, líkt og Fernandinho og Sergio Agüero.