Guardiola: Mjög erfitt að vera einum færri í áttatíu mínútur

Pep Guardiola segir það óraunhæft að tala um að ná Liverpool eftir að Manchester City tapaði fyrir Úlfunum í kvöld.

City er nú 14 stigum á eftir Liverpool og á toppliðið leik til góða á ríkjandi meistarana.

„Við verðum að hugsa um næsta leik og um að vinna leikina okkar. Það er óraunhæft að hugsa um að ná Liverpool,“ sagði Guardiola eftir tap City.

Úlfarnir unnu 3-2 sigur eftir að hafa lent 2-0 undir. City spilaði á tíu mönnum nær allan leikinn eftir að Ederson var sendur út af á 11. mínútu.

„Áttatíu mínútur einum færri er svo erfitt, svo krefjandi.“

„Við gátum ekki varið úrslitin. Leikmennirnir mínir gerðu allt sem þeir gátu.“