Enski boltinn

Solskjær býst kannski við tveimur kaupum í janúar en aðalfjörið verður í sumar

Óskar Ófeigur Jónsson skrifar
Ole Gunnar Solskjær þarf að gera góða hluti í næstu félagsskiptagluggum.
Ole Gunnar Solskjær þarf að gera góða hluti í næstu félagsskiptagluggum. Getty/ Matthew Peters
Ole Gunnar Solskjær, knattspyrnustjóri Manchester United, var spurður út í það hvað félagið ætli að gera í leikmannamálum sínum í janúarglugganum. Hver leikmaðurinn á fætur öðrum er orðaður við Old Trafford en hver er stefna norska stjórans?

Solskjær hefur verið lofað að fá pening til að styrkja liðið sitt og hann gæti eytt eitthvað af þeim ef spennandi kostir bjóðast í janúarglugganum. Það er engu að síður búist við því að meirihluti kaupa á nýjum mönnum fari fram næsta sumar.

Manchester United þarf að styrkja sig inn á miðjunni og í framlínunni. Emre Can hjá Juventus kemur til greina en þá hafa útsendarar United einnig verið að skorað menn eins og Richarlison hjá Everton, Erling Braut Haaland hjá Red Bull Salzburg og Moussa Dembele hjá Lyon samkvæmt heimildum Evening Standard.





Blaðamaður Evening Standard gekk á Ole Gunnar Solskjær á blaðamannafundi fyrir Evrópudeildarleik á móti Partizan Belgrad.

„Við erum alltaf að skoða leikmenn. Kannski kemur enginn í janúar en það gæti komið einn og það gætu komið tveir. Sumarglugginn er aftur á móti sá stóri fyrir okkur og það er vitað að það er erfitt að gera góð kaup í janúar,“ sagði Ole Gunnar Solskjær.

Jadon Sancho hjá Borussia Dortmund er örugglega á óskalista Manchester United og þá er félagið einnig að fylgjast með James Maddison hjá Leicester.

Solskjær leyfði Romelu Lukaku og Alexis Sanchez að fara í sumar en náði ekki að fylla í þeirra skörð. Framlínuhópur liðsins er því mjög þunnskipaður.

Pressan hefur aukist til mikilla muna á Solskjær eftir verstu byrjun Manchester United frá árinu 1986. Liðið er nú tíu stigum frá fjórða sætinu. Solskjær sér samt jákvæða hluti þrátt fyrir aðeins þrjá deildarsigra á öllu tímabilinu til þessa.





„Þetta er lið sem er að bæta sig og því meiri tíma sem við fáum því meira munum við bæta okkur. Við höfum verið að endurheimta leikmenn úr meiðslum og ég sé framfarir hjá ungu leikmönnunum. Við þurfum reynsluboltana okkar. Paul (Pogba) er kominn til baka og Anthony (Martial) líka. Vonandi fáum Luke (Shaw) til baka sem fyrst og Eric (Bailly) er líka koma til baka fljótlega,“ sagði Solskjær.

„Þetta mót er ekki aðalmálið fyrir okkur heldur ferlið sem liðið er í. Þetta er mikil vinna og við þurfum að halda hópinn og byggja upp liðsandann. Það leggja allir mikið á sig hér og við viljum gera vel. Af einhverjum ástæðum hafa úrslitin ekki fallið með okkur. Við ættum að geta náð nokkrum úrslitum og komist á rétta braut. Laugardagurinn var vonbrigði en nú getum við unnið tvo leiki fyrir landsleikjahléið,“ sagði Solskjær.

Enski boltinn

Mest lesið


Fleiri fréttir

Sjá meira


×

Mest lesið