Gomes tryggði United sigur í síðasta leiknum í Asíu- og Ástralíureisunni | Sjáðu mörkin

Hinn 18 ára Angel Gomes skoraði sigurmark Manchester United gegn Tottenham á International Champions Cup í Sjanghaí í dag. Lokatölur 1-2, United í vil.

Þetta var síðasti leikur United á ferð þeirra um Asíu og Ástralíu. Liðið vann alla fjóra leiki sína þar með markatölunni 9-1.

Four wins from four on #MUTOUR!#MUFC#ICC2019

— Manchester United (@ManUtd) July 25, 2019

Anthony Martial kom United yfir á 21. mínútu eftir sendingu frá Andreas Pereira. Staðan var 0-1 í hálfleik, United í vil.

Lucas Moura jafnaði fyrir Tottenham á 65. mínútu. Þetta var fyrsta markið sem United fær á sig á undirbúningstímabilinu.

Þegar tíu mínútur voru til leiksloka skoraði Gomes sigurmark United eftir góðan samleik við Juan Mata. Gomes er þriðji unglingurinn sem skorar fyrir United á undirbúningstímabilinu. Áður voru James Garner og Mason Greenwood búnir að skora.

Næsti leikur United er gegn uppeldisfélagi Ole Gunnars Solskjær, Kristiansund í Noregi, á þriðjudaginn. Sama dag mætir Tottenham Real Madrid í Audi Cup.

Mörkin úr leik Tottenham og Manchester United má sjá hér fyrir neðan.