Erlent

Dreymir börnin halda grátandi í móður sína á meðan flugvélin hrapar

Kristín Ólafsdóttir skrifar
Paul Njoroge hélt uppi myndum af fjölskyldu sinni frammi fyrir þingnefndinni í dag.
Paul Njoroge hélt uppi myndum af fjölskyldu sinni frammi fyrir þingnefndinni í dag. Vísir/EPA

Kanadamaður, hvers fjölskylda fórst þegar farþegaþota af gerðinni Boeing 737 Max hrapaði í Eþíópíu í mars, segist sakna fjölskyldu sinnar hvern einasta dag. Hann gagnrýnir flugvélaframleiðandann Boeing og flugmálayfirvöld harðlega fyrir viðbrögð þeirra í kjölfar slyssins.

Eiginkona Kanadamannsins Paul Njoroge, þrjú ung börn hans og tengdamóðir fórust í slysinu sem varð nærri Addis Ababa. Enginn þeirra 157 sem voru um borð komst lífs af þegar þotan hrapaði.

Allar Boeing 737 Max-farþegaþotur voru kyrrsettar eftir slysið en aðeins fimm mánuðum fyrr höfðu 189 manns farist með sams konar vél Lyon Air í Indónesíu.

Óbærilegur söknuður

Njoroge ávarpaði þingnefnd Bandaríkjaþings á sérstökum fundi um flugöryggi, sem haldinn var vegna slysanna í dag. Þar lýsti hann m.a. martröðum sem hann hefur fengið eftir slysið, þar sem hann sér börnin fyrir sér ríghalda grátandi í móður sína, á meðan flugvélin hrapar.

Þá lýsti hann jafnframt óbærilegum söknuði sem hann hefur fundið fyrir í kjölfar slyssins.

„Það eina sem ég gat hugsað um var 737 Max-þokan að berjast við að hækka flugið og steypast að lokum til jarðar, með þeim afleiðingum að fjölskylda mín og 152 aðrir létu lífið,“ sagði Njoroge.

„Ég sakna þeirra sérhverja mínútu, sérhvers dags.“

Frá slysstað nærri Addis Ababa í Eþíópíu. Böndin hafa borist að hugbúnaði í Boeing 737 Max 8-vélinni sem hafi valdið því að vélin tók dýfu og hrapaði skömmu eftir flugtak. AP/Mulugeta Ayene

Skammaðist í Boeing

Njoroge beindi orðum sínum einnig beint að forsvarsmönnum Boeing og gagnrýndi þá fyrir að reyna að afvegaleiða umræðuna um slysið með „skammarlegu hegðunarmynstri“.

„Þann 4. apríl, þremur vikum eftir að fjölskylda mín fórst, […] beindi Boeing athyglinni frá raunverulegri orsök slysanna – hönnunargöllum í 737 Max-vélunum – og byrjaði að tala um „mistök erlendra flugmanna“.“

Forsvarsmenn Boeing þvertóku þó fyrir í síðasta mánuði að flugmenn vélarinnar sem fórst í Eþíópíu hefðu valdið slysinu. Þetta kom fram svari flugvélaframleiðandans við fullyrðingum bandaríska þingmannsins Sam Graves, sem hélt því fram að mistök flugmannanna hefðu átt þar hlut að máli.

Sjá einnig: Bandarísk flugfélög halda 737 MAX-þotunum áfram á jörðu niðri

Njoroge gagnrýndi einnig flugmálayfirvöld Bandaríkjanna, FAA, og sakaði þau um að hafa brugðist eftirlitshlutverki sínu.

„Ef Boeing fær að halda áfram þessum ólögmæta rekstri sínum mun önnur flugvél hrapa og verða mér eða þér eða börnum þínum eða öðrum fjölskyldumeðlimum þínum að bana. Það eruð þið sem verðið að leiða þessa baráttu í nafni flugöryggis í heiminum,“ sagði Njoroge.

Vitnisburð Njoroge má sjá í heild í spilaranum hér að neðan.

737 Max-vélar Boeing eru enn kyrrsettar um allan heim og óvíst er hvenær þeim verður hleypt aftur í loftið. Ekki er gert ráð fyrir að það verði fyrr en í fyrsta lagi í nóvember og að öllum líkindum ekki fyrr en árið 2020.

Eftir flugslysin í Indónesíu og Eþíópíu beindust böndin að sjálfstýringarhugbúnaði 737 MAX-vélanna þar sem vísbendingar voru um að hugbúnaður sem á að koma í veg fyrir ofris hafi stýrt flugvélunum niður á við þannig að þær hröpuðu.

Í síðasta mánuði greindi CNN svo frá því að annar, en sambærilegur, galli hefði fundist í stýrikerfi vélanna sem þvingar þær til að beina nefinu niður í flugi.


Tengdar fréttir

Boeing ekki lengur stærstir á markaðnum

Flugvélaframleiðandinn Boeing sem hefur verið stærsti framleiðandinn á flugvélamarkaðnum síðastliðin átta ár hafa nú lútið í lægra haldi fyrir samkeppnisaðilanum Airbus sem hafa verið næst stærstir síðast liðin ár.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.