Sími Gini Wijnaldum lifði af mikla flugferð í skrúðgöngunni

Georginio Wijnaldum gefur ekkert eftir í baráttunni á miðju Liverpool og sími Hollendingsins er greinilega hörkutól líka.

Liverpool liðið tók allt þátt í veglegri skrúðgöngu í miðborg Liverpool í gær þar sem leikmenn, þjálfarar og starfsmenn fögnuðu sjötta Evrópumeistaratitli félagsins.

Leikmenn voru allir samankomnir upp á útsýnisrútu og það lá mjög vel á þeim enda mikið um dýrðir allt í kringum þá á götunum auk þess sem flugeldum og glitpappír var reglulega skotið upp og þekktustu söngvarnir sungnir.

Liverpool mennirnir voru flestir með snjallsíma sína á lofti að taka upp öll ósköpin og það hlaut að vera að einn síminn fær útbyrðis.

Síminn sem fékk óvænta flugferð var sími hollenska miðjumannsins Georginio Wijnaldum. Hann var að taka upp myndband á sama tíma og það besta við það er að síminn hans lifði af flugferðina og upptakan var enn í gangi þegar hann fékk hann aftur.

Úr varð mjög áhugavert myndband eins og sjá má hér fyrir neðan.

Gini Wijnaldum dropped his phone off Liverpool’s trophy parade bus

“It’s still working!” #LFC#LFCParadepic.twitter.com/8G2sY11Ne6

— GiveMeSport Football (@GMS__Football) June 2, 2019

Georginio Wijnaldum náði sér ekki alveg á strik í úrslitaleiknum og var tekinn af velli en innkoma hans í seinni undanúrslitaleikinn á móti Barcelona breytti öllu fyrir Liverpool-liðið.

Georginio Wijnaldum kom inn á sem varamaður í hálfleik eftir að Andrew Robertson meiddist. Þá var staðan 1-0.

Átta mínútum síðar skoraði Wijnaldum annað mark Liverpool og það tók hann síðan bara tvær mínútur að koma Liverpool liðinu í 3-0. Staðan var þá orðin jöfn en Barcelona vann fyrri leikinn 3-0.

Það var síðan Divock Origi sem skoraði fjórða markið ellefu mínútum fyrir leikslok og tryggði Liverpool sæti í úrslitaleiknum.