Innlent

Páll komst loksins á stefnumót í kvöld

Kristján Már Unnarsson skrifar
Íslenski þristurinn Páll Sveinsson kominn í þristahópinn á Reykjavíkurflugvelli í kvöld.
Íslenski þristurinn Páll Sveinsson kominn í þristahópinn á Reykjavíkurflugvelli í kvöld. Stöð 2/KMU.

Íslenskir þristavinir glöddust innilega þegar Páll Sveinsson lenti á Reykjavíkurflugvelli laust upp úr klukkan sjö í kvöld. Draumur þeirra, um að eini íslenski þristurinn kæmist til móts við bandaríska þristahópinn, hafði þar með ræst. Sýnt var frá vellinum í fréttum Stöðvar 2.

Á flugvellinum biðu hans fimm aðrir þristar, sem rétt eins og Páll, höfðu þjónað Bandamönnum í stríðsrekstrinum á árum síðari heimsstyrjaldarinnar.

Margar flugvélanna, eins og þessi, Virginia Ann, eru málaðar í herlitum, eins og þeir voru í síðari heimsstyrjöldinni. Stöð 2/KMU.

Eldri menn úr fluggeiranum töldu að fara þyrfti jafnvel sex áratugi aftur í tímann til að finna dæmi um svo marga þrista samtímis á Reykjavíkurflugvelli. 

Flugvirkjar í sjálfboðavinnu fyrir Þristavinafélagið höfðu allt frá síðustu helgi unnið að viðgerð á öðrum hreyfli Páls á Akureyrarflugvelli. Olíuleki á erfiðum stað plagaði hreyfilinn og voru þristavinir að verða úrkula vonar um að verkinu lyki í tæka tíð.

Það var svo loksins á sjötta tímanum í kvöld, þegar hreyfilinn hafði gengið drjúga stund, sem grænt ljós var gefið á að vélinni yrði flogið suður, og flugmennirnir voru einnig í sjálfboðavinnu.

Páll Sveinsson á flugstæðinu með hinum þristunum. Stöð 2/KMU.

Á sama tíma höfðu amerísku þristarnir lent hver af öðrum í Reykjavík í leiðangri sínum yfir Atlantshafið. Þeim er öllum stefnt til Normandi í Frakklandi þann 6. júní þegar þess verður minnst að 75 ár verða liðin frá D-deginum 1944. 

Í annað sinn í vikunni var í skyndi boðað til flugsýningar með litlum fyrirvara. Svæði norðan Loftleiðahótelsins var girt af. Þar var fólki boðið að skoða þessar sögufrægu vélar í návígi, ræða við áhafnarmeðlimi og ganga um borð í sumar þeirra.
 

Fjöldi fólks mætti út á flugvöll í veðurblíðunni í kvöld til að skoða forngripina, sem sumir bera skemmtileg nöfn, eins og þessi; Betsy's Biscuit Bomber. Stöð 2/KMU.

Það sýndi sig á þeim mannfjölda sem mætti, bæði núna og í fyrrakvöld, hver áhuginn er á leiðangri þristanna, sögu DC-3 og C-47-vélanna, sem og þessari ástsælu flugvélartegund. 

Auk Páls Sveinssonar bauðst gestum í kvöld að skoða flugvélar sem bera gælunöfnin Betsy’s Biscuit Bomber, Virginia Ann, Pan Am, Flabob Express og D-Day Doll.

Rétt eins og þristarnir í fyrsta hópnum, sem kom í byrjun vikunnar, eiga þessir það flestir sammerkt að eiga áhugaverða og jafnvel ævintýralega rekstrarsögu.

Þessi vél, sem nú heitir Flabob Express, hafði það verkefni í stríðinu að fljúga með æðstu ráðamenn Bretlands, þar á meðal sjálfan Winston Churchill og meðlimi bresku konungsfjölskyldunnar. Stöð 2/KMU.

Áformað er að erlendu þristarnir haldi áfram för sinni til Bretlands á morgun. Búast má við fyrsta flugtaki fyrir klukkan átta á fyrramálið og að þeir verði allir farnir fyrir hádegi. 

Enn eru þrír þristar ókomnir af þeim fjórtán, sem fljúga frá Bandaríkjunum til Evrópu, og er búist við þeim á næstu dögum. 

Lendingar nokkurra þristanna í dag mátti sjá í fréttum Stöðvar 2:


Tengdar fréttir

Þristarnir streyma inn til Reykjavíkur

Alls fjórtán flugvélar frá stríðsárunum, svokallaðir þristar, millilenda á Íslandi næstu tvo sólarhringa á leið sinni frá Bandaríkjunum til Evrópu til að minnast innrásarinnar í Normandí.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.