Reykjavíkurslagur og Pepsi Max-mörkin í kvöld

Síðasti leikur þriðju umferðar Pepsi Max-deildar karla fer fram í kvöld og leiknum verður fylgt á eftir með Pepsi Max-mörkunum.

Umferðinni lýkur með stórleik í Vesturbænum er Fylkismenn heimsækja KR í Reykjavíkurslag en þessir leikir liðanna hafa í gegnum tíðina verið fjörugir.

KR er með fjögur stig eftir fyrstu tvo leikina; jafntefli gegn Stjörnunni og sigur gegn ÍBV. Fylkir er einnig með fjögur stig; jafntefli gegn ÍA og sigur gegn ÍBV.

Flautað verður til leiks klukkan 19.15 í kvöld og verður leikurinn í beinni útsendingu á Stöð 2 Sport. Upphitun hefst klukkan 18.55.

Klukkan 21.15 verða svo Pepsi Max-mörkin á dagskrá en þar munu Hörður Magnússon og sparkspekingar hans gera upp umferðina.