Jenas: Lloris hefur brugðist Spurs of oft og ætti að fara á bekkinn

Hugo Lloris hefur brugðist Tottenham of oft. Þetta segir Jermaine Jenas, fyrrverandi leikmaður Tottenham og núverandi álitsgjafi hjá BBC.

Lloris gerði sig sekan um dýrkeypt mistök þegar Tottenham sótti Liverpool heim í gær. Á lokamínútunni, í stöðunni 1-1, missti hann skalla Mohameds Salah, klaufalega frá sér. Boltinn fór í samherja hans, Toby Alderweireld, og rúllaði yfir marklínuna. Þetta slysalega sjálfsmark réði úrslitum í leiknum.

„Spurs spilaði vel í seinni hálfleik og hefði átt að vinna leikinn. Þess í stað töpuðu þeir vegna mistaka Lloris. Þetta er ekki viðunandi og í baráttunni um Meistaradeildarsæti var þetta það síðasta sem Spurs þurfti á að halda frá fyrirliða sínum. Hann hefur gert of mörg svona mistök síðustu tímabil,“ sagði Jenas um franska heimsmeistarann.

„Hann á enn heimsklassa vörslur, eins og í útileiknum gegn Borussia Dortmund, en bestu markverðirnir eru dæmdir út frá stöðugleika og traustinu sem þeir færa varnarlínunni. Lloris býður ekki lengur upp á það eins og sást gegn Liverpool. Ef Tottenham vill taka næsta skref og berjast um titla gætu þeir þurft að líta á markvarðastöðuna.“

Lloris kom til Tottenham frá Lyon 2012. Jenas segir að hann hafi ekki spilað verr fyrir Spurs síðan hann kom til Englands.

„Lloris ætti að vera á hátindi ferilsins en er óöruggari en nokkru sinni síðan hann kom til Tottenham. Þegar rætt er um bestu markverði heims kemur nafn hans alltaf upp en það virðist byggt á því sem hann hefur gert, frekar en frammistöðu hans í dag,“ sagði Jenas.

Tottenham mætir Crystal Palace í fyrsta leiknum á nýja heimavellinum sínum á miðvikudaginn. Jenas segir að Maurico Pochettino, knattspyrnustjóri Spurs, eigi að íhuga að setja Lloris á bekkinn og gefa Paolo Gazzaniga tækifæri milli stanganna.

„Ég held að hann sé ekki hræddur að henda honum á bekkinn og það gerir honum auðveldara fyrir að vera með Gazzaniga til taks. Hann hefur alltaf staðið sig frábærlega þegar ég hef séð hann spila. Eins grimmt og það hljómar myndi ég íhuga það alvarlega að taka Lloris úr liðinu ef ég væri Pochettino,“ sagði Jenas.

„Þetta er stór stund, fyrsti leikurinn á nýja vellinum, og Lloris finnst hann væntanlega eiga að spila. En Pochettino getur ekki hugsað um tilfinningar leikmannsins. Forgangsatriðið hjá Spurs er að enda í einu af fjórum efstu sætunum. Meistaradeildarsæti er svo mikilvægt fyrir framtíð félagsins.“

Tottenham er enn í 3. sæti ensku úrvalsdeildarinnar þrátt fyrir að hafa ekki unnið leik síðan 10. febrúar.