Bikartitill með Watford stærri en öll afrekin með United

Ben Foster segir það muni verða stærri stund á hans ferli ef hann vinnur ensku bikarkeppnina með Watford heldur en allt sem hann afrekaði hjá Manchester United.

Hinn 36 ára Foster er að eiga eitt sitt besta tímabil í vetur, en hann kom til Watford frá West Bromwich Albion fyrir tímabilið.

Foster var hetja Manchester United í úrslitum deildarbikarsins árið 2009. Þá sagði Sir Alex Ferguson hann vera framtíðar arftaka Edwin van der Sar.

Foster náði hins vegar ekki að fylgja árangrinum eftir og var seldur til Birmingham City ári seinna.

„Ég vann deildarbikarinn með Birmingham [árið 2011] og það var ein besta stund ferilsins. Við spiluðum við Arsenal, vorum litla liðið en við unnum og stuðningsmennirnir misstu sig. Þetta skipti þá svo miklu máli,“ sagði Foster.

„Þetta mun lifa með mér það sem eftir er og ef við myndum vinna bikarinn núna með Watford þá væri þetta eins. Þegar ég vann deildarbikarinn með United þá var það sjálfsagður hlutur.“

„Ég man að við stigum upp í rútuna eftir leikinn og þá var bara sagt: Jæja, æfing á morgun, það er Meistaradeildarleikur í vikunni. Það var ekki fagnað, það var eins og menn hefðu gleymt þessu strax.“

„Ég gat aldrei skilið hvernig þetta var bara enn einn titillinn. Ef maður vinnur með liðum eins og Birmingham, West Brom og Watford, þá skiptir það máli.“

Foster á þrjá deildarbikartitla og átta A-landsleiki fyrir England í afrekaskápnum en náði þó ekki að uppfylla alveg allt það sem hann átti að geta gert þegar hann var að brjótast fram á sjónarsviðið.

Hann viðurkenndi að hann hafi farið of snemma í jafn stórt félag og Manchester United.

„Það er frábært að hafa verið hjá Manchester United, ekki misskilja mig, og ég mun aldrei sjá eftir neinu af því sem ég gerði á ferlinum. En þetta var klárlega rangur staður á röngum tíma fyrir mig.“

„Ég var ekki undirbúinn andlega fyrir það að vera hjá United en það hjálpaði mér upp á framhaldið.“

Watford mætir Wolves í undanúrslitum ensku bikarkeppninnar í dag. Sigurvegari þess leiks mætir Manchester City í úrslitaleiknum.