Enski boltinn

Enginn Íslendingur á blaði þegar BBC valdi úrvalslið útlendinga

Óskar Ófeigur Jónsson skrifar
Gylfi Þór Sigurðsson og Eiður Smári Guðjohnsen.
Gylfi Þór Sigurðsson og Eiður Smári Guðjohnsen. Samsett/Getty

Eiður Smári Guðjohnsen og Gylfi Þór Sigurðsson hafa gert frábæra hluti á ferli sínum í ensku úrvalsdeildinni en þegar  menn eins og Luis Suarez, N'Golo Kante, Ruud van Nistelrooy, Dennis Bergkamp og Mohamed Salah komast ekki í úrvalslið útlendinga deildarinnar þá áttu þeir nú ekki mikla möguleika. 

BBC tók sig til og valdi ellefu manna úrvalslið úr sögu ensku úrvalsdeildarinnar skipað leikmönnum sem fæddust utan Bretlandseyja.

Þorvaldur Örlygsson var bara einn af þrettán erlendum leikmönnum þegar ensku úrvalsdeildin hófst árið 1992. Í dag eru meira en þrjú hundruð erlendir leikmenn í ensku úrvalsdeildinni.

Alls hafa 2016 leikmenn utan Bretlandseyja spilað í ensku úrvalsdeildinni þar af hafa sautján þeirra komið frá Íslandi.



Enginn íslenskur leikmaður var aftur á móti settur niður á blað þegar BBC valdi fyrrnefnt úrvalslið útlendinga en auk ellefu manna byrjunarliðs voru nefndir til leikmenn sem voru næstir því að komast í liðið.

Það hjálpaði ekki okkar strákum að þeir sem komu til greina urðu að hafa komist í úrvalslið tímabils sem er valið af leikmönnum deildarinnar. Það útilokaði okkar fremstu menn eins og Gylfa Þór Sigurðsson og Eið Smára Guðjohnsen.

Aðalástæðan var þó örugglega sú að það hafa margir af bestu knattspyrnumönnum heims á sínum tíma spilað í ensku úrvalsdeildinni á öllum þessum árum. Samkeppnin um sæti í liði var því mikil og varla hægt að búast við því að Ísland ætti mann í hópi þeirra bestu í sögunni þrátt fyrir að þeir Gylfi og Eiður Smári hafi báðir gert mjög góða hluti í deildinni.

Það var greinilega erfiðast að velja markverði í liðið því þrír voru jafnir. Hér fyrir neðan má sjá úrvalsliðið og þá sem voru næstir því að komast í liðið. Þá er þetta mjög sókndjarft lið með bara þrjá varnarmenn en aftur á móti fjóra framherja.

Nokkrir leikmannanna eru enn að spila í ensku úrvalsdeildinni eins og David de Gea, markvörður Manchester United, Vincent Kompany, varnarmaður Manchester City, David Silva, miðjumaður Manchester City og Sergio Aguero, framherji Manchester City.

Þá er Cristiano Ronaldo að sjálfsögðu í liðinu en hann hefur spilað með Real Madrid og Juventus síðan að hann yfirgaf Manchester United.  

BBC setti líka af stað kosningu á besti erlenda leikmanninum í sögu ensku úrvalsdeildarinnar en hana má nálgast hér.

Úrvalslið útlendinga í ensku úrvalsdeildinni 1992/93-2018/19

Markmenn
David de Gea (Man Utd)
Petr Cech (Chelsea, Arsenal)
Peter Schmeichel (Man Utd, Aston Villa, Man City)

Varnarmenn
Nemanja Vidic (Man Utd)
Jaap Stam (Man Utd)
Vincent Kompany (Man City)

Miðjumenn:
Patrick Vieira (Arsenal, Man City)
David Silva (Man City)
Cristiano Ronaldo (Man Utd)

Sóknarmenn:
Thierry Henry (Arsenal)
Sergio Aguero (Man City)
Eric Cantona (Leeds, Man Utd)
Didier Drogba (Chelsea)

Aðrir sem komu sterklega til greina
Markmenn: Edwin van der Sar
Varnarmenn: Sami Hyypia og Ricardo Carvalho.
Miðjumenn: N'Golo Kante, David Ginola, Yaya Toure og Claude Makelele
Sóknarmenn: Luis Suarez, Ruud van Nistelrooy, Dennis Bergkamp og Mohamed Salah.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.