Guardiola: Silva er ótrúlegur

Manchester City lagði D-deildarlið Newport í ensku bikarkeppninni í gærkvöld. Pep Guardiola hrósaði David Silva í leikslok.

„Silva er ótrúlegur. 33 ára og hann berst og spilar af fullum krafti í hæsta gæðaflokki. David er frábær leikmaður, hvað meira get ég sagt,“ sagði Guardiola.

City vann leikinn 4-1 en staðan var enn markalaus í hálfleik þar sem City reyndist erfitt að brjóta á bak aftur þétta vörn Newport.

„Við vorum rólegir í seinni hálfleik og spiluðum frábærlega miðað við aðstæður.“

„Við höfum hingað til tekið einn leik í einu og reynum að vinna. Þú spilar allt öðruvísi hér en á heimavelli gegn Chelsea.“

„Við sjáum til í maí og júní hvernig okkur gengur en það er mikilvægt að vera enn í öllum keppnum í febrúar.“

Næsti leikur City er gegn Schalke í Meistaradeild Evrópu.