Enski boltinn

Salah þykir gagnrýnin ósanngjörn

Óskar Ófeigur Jónsson skrifar
Mohamed Salah hefur beðið eftir marki í að verða tvo mánuði.
Mohamed Salah hefur beðið eftir marki í að verða tvo mánuði. Getty/Robbie Jay Barratt
Mohamed Salah skoraði síðast fyrir Liverpool í leik á móti Bournemouth 9. febrúar síðastliðinn. Það eru því næstum því tveir mánuðir síðan að hann skoraði síðast. Salah skilur samt ekkert í því að fólk sé að gagnrýna hann.

Salah fagnaði sigurmarki Liverpool á móti Tottenham í gær eins og sínu eigin en markið var sjálfsmark Tottenham mannsins Toby Alderweireld. Salah átti hins vegar mikinn þátt í þessu marki og það tryggði Liverpool mjög dýrmæt þrjú stig í baráttunni um enska meistaratitilinn.

Þetta mark á móti Bournemouth er eina mark Mohamed Salah í síðustu ellefu leikjum hans í öllum keppnum. Liðið er samt á toppnum í ensku úrvalsdeildinni og í átta liða úrslitum Meistaradeildarinnar.





Jamie Carragher fékk Mohamed Salah í viðtal á Sky Sports eftir leik og spurði Egyptann út í gagnrýnina.

„Ég skoraði ekki í nokkrum leikjum í röð en það eru sumir leikmenn sem eru með jafnmörg mörg og ég og fólk er að segja að þeir hafi aldrei spilað betur en á þessu tímabili,“ sagði Mohamed Salah.

Mohamed Salah hefur skorað 17 deildarmörk og er annar markahæsti maður deildarinnar með þeim Harry Kane hjá Tottenham, Pierre-Emerick Aubameyang hjá Arsenal og Sadio Mané hjá Liverpool. Sergio Agüero er markahæstur með 19 mörk.

„Þetta eru þrír eða fjórir leikmenn en enginn gagnrýnir þá. Það eru allir að segja að þeir hafi átt gott tímabil en ég er sá eini af þeim sem hefur átt slæmt tímabil. Ég vil vinna ensku úrvalsdeildina og það er það mikilvægast fyrir mig,“ sagði Salah.





Mohamed Salah hefur ekki verið sannfærandi upp við markið í þessum kuldakafla sínum á tímabilinu og Egyptinn er búinn að fara illa með mörg góð færi í undanförnum leikjum. Slök og óhnitmuðuð skot er eitthvað sem við höfum ekki mátt venjast frá honum og það hefur kallað á enn meira sviðsljós á markaleysi hans.

Andstæðingar Liverpool leggja aftur á móti ofurkapp á það að gæta hans og það hefur opnað fyrir aðra leikmenn liðsins. Hann er því að hjálpa Liverpool-liðinu þrátt fyrir að skotskórnir hans séu týndir.





Liverpool vann heppnissigur á Tottenham í gær og Salah viðurkenndi að liðið hafi ekki spilað vel.

„Liðið þarf ekki alltaf að spila vel en það mikilvægasta er að ná í stigin. Stóru liðin finna alltaf leiðir til að landa stigunum og það gerðum við í þessum leik,“ sagði Salah.

„Allir leikir eru erfiðir. Við verðum bara að halda okkur inn í kapphlaupinu. Næsti leikur er á móti Southampton og þeir eru að berjast fyrir lífi sínu,“ sagði Salah.

„Við þurfum að líta á hvern leik sem áskorun. Tottenham spilaði vel og voru nálægt því að ná í stig. Nú tökum við bara hvern leik þegar hann kemur,“ sagði Salah.

Enski boltinn

Tengdar fréttir

Nafn Liverpool skrifað í skýin eða jafnvel bara á bikarinn

Liverpool hafði heppnina með sér í gær. Því getur enginn mótmælt. Þetta var aftur á móti ekki í fyrsta sinn sem hlutirnir falla með Liverpool á tímabilinu og knattspyrnusérfræðingar á BBC og Sky Sport hafa verið duglegir að benda á það í greiningunni sinni á stöðunni eftir leik Liverpool og Tottenham í gær.

Mest lesið


Fleiri fréttir

Sjá meira


×

Mest lesið