Man Utd hefur samband við Palace vegna Wan-Bissaka

Manchester United hefur lagt fram tilboð í enska hægri bakvörðinn Aaron Wan-Bissaka ef marka má heimildir Sky Sports fréttastofunnar.

Wan-Bissaka sló í gegn með Crystal Palace á síðustu leiktíð en hann á þrjú ár eftir af samningi sínum við Lundúnarliðið og hafa forráðamenn félagsins gefið það út að félagið hafi ekki hug á selja kappann.

Þessi 21 árs gamli varnarmaður var valinn leikmaður ársins hjá Crystal Palace sem hafnaði í 12.sæti ensku úrvalsdeildarinnar en þetta var hans annað tímabil með aðalliði Palace.

Talið er að Ole Gunnar Solskjær vilji fá nýjan hægri bakvörð til félagsins til að fylla skarð Antonio Valencia sem kvaddi félagið í vor eftir 10 ára veru.