Shaw gæti verið frá í mánuð

Luke Shaw, varnarmaður Manchester United, er meiddur aftan í læri og gæti verið frá í mánuð.

Shaw fór meiddur af velli í fyrri hálfleik þegar United tapaði fyrir Crystal Palace, 1-2, í ensku úrvalsdeildinni á laugardaginn.

Eftir leikinn sagði Ole Gunnar Solskjær, knattspyrnustjóri United, að Shaw yrði væntanlega klár í slaginn gegn sínu gamla liði, Southampton, um næstu helgi.

Meiðslin eru þó alvarlegri en búist var við í fyrstu og Shaw gæti verið frá í um fjórar vikur.

Ashley Young, fyrirliði United, kom inn á fyrir Shaw gegn Palace og mun væntanlega spila næstu leiki liðsins í stöðu vinstri bakvarðar.