Raiola byrjaður að leita að nýju félagi fyrir Balotelli

Mario Balotelli verður samningslaus í sumar og ef marka má umboðsmann hans, Mino Raiola, er slegist um undirskrift Ítalans litríka. 

Balotelli hefur leikið með Nice í Frakklandi frá árinu 2016 þar sem hann hefur skorað 39 mörk í 58 leikjum. Raiola er þekktur fyrir digurbarkalegar yfirlýsingar og hann slær ekkert af þegar hann ræðir um framtíð skjólstæðings síns.

„Mario er tilbúinn til að snúa aftur í ensku úrvalsdeildina. Hann hefur þroskast og er orðinn einn af tíu bestu framherjum heims. Hann er besti ítalski sóknarmaðurinn og er líklega verðmetinn á 100 milljónir evra. Hann er að verða samningslaus og þetta eru því kjarakaup.“

„Ég er búinn að vera í viðræðum við mörg félög á Englandi og á Ítalíu. Ég hef rætt við Juventus, Roma, Napoli og Inter,“ segir Raiola.

Hinn 27 ára gamli Balotelli hefur leikið með Inter Milan, Manchester City, Liverpool og AC Milan á ferlinum.