Sjáðu Messi-takta Birnis, sprellimark Guðmundar og hin mörkin úr stórsigri Fjölnis

Fjölnir vann glæsilegan sigur á Stjörnunni í þriðju umferð riðils þrjú í A-deild Lengjubikars karla í fótbolta í Egilshöllinni í gærkvöldi, 5-2, en leikurinn var í beinni útsendingu á Stöð 2 Sport HD.

Mörkin í leiknum voru ekki bara mörg heldur voru þau flest öll nokkuð glæsileg. Markasúpan hófst á 17. mínútu þegar að Anton Freyr Ársælsson þrumaði boltanum í slána og inn fyrir Grafarvogsliðið.

Fjölnir komst í 2-0 áður en Guðmundur Steinn Hafsteinsson minnkaði muninn þegar að Þórður Ingason, markvörður og fyrirliði Fjölnis, skaut boltanum í hann og í markið. Klaufalegt en skondið mark.

Stjarnan jafnaði metin á 30. mínútu og staðan 2-2 í hálfleik en á 56. mínútu kom hinn stóri og stæðilegi Ægir Jarl Jónasson Fjölni aftur yfir með skalla langt utan úr teig yfir Terrence William Dietrich í marki Stjörnunnar, 3-2.

Þórir Guðjónsson skoraði svo fjórða mark Fjölnis úr vítaspyrnu fimm mínútum síðar en síðasta mark leiksins var afskaplega glæsilegt. Það skoraði Birnir Snær Ingason á 68. mínútu.

Birnir fékk boltann á miðjum vellinum og tók á sprett að marki. Hann fíflaði Óttar Bjarna Guðmundsson upp úr skónum rétt fyrir framan vítateiginn og fór svo illa með Baldur Sigurðsson áður en hann renndi boltanum snyrtilega í netið. Hugguleg Messi-tilþrif hjá Birni Snæ sem hefur verið að spila vel á undirbúningstímabilinu.

Þetta var fyrsta tap Stjörnunnar á undirbúningstímabilinu en liðið vann alla fjóra leiki síðan í Fótbolti.net-mótinu á leið sinni til sigurs þar og var búið að vinna fyrstu tvo leikina í Lengjubikarnum.

Það sem meira er var Stjarnan aðeins búin að fá á sig tvö mörk í þessum sex leikjum þannig Fjölnir meira en tvöfaldaði þann fjölda í leiknum.

Markasúpuna má sjá hér að ofan.