Sport

Hetjusaga ársins í NFL: Handarlaus varnarmaður stal senunni

Tómas Þór Þórðarson skrifar
Shaquem Griffin lætur fötlun sína ekki hafa áhrif á sig.
Shaquem Griffin lætur fötlun sína ekki hafa áhrif á sig. vísir/getty
„Ef einhver segir mér að ég geti ekki gert eitthvað fær sá hinn sami að sjá hvað ég get afrekað.“

Þessi orð Shaquem Griffin, sem þá var leikmaður UCF-háskólans í amerískum fótbolta, gætu áður en langt um líður orðin ein þau frægustu í bandarískri íþróttasögu.

Þessi 22 ára drengur gæti verið á leiðinni að verða stórstjarna í NFL-deildinni en hann stal senunni á NFL Combine í Indianapolis í gær þar sem strákar sem eru á leiðinni í nýliðavalið sýna sig fyrir þjálfurum deildarinnar.

Hvað er svona merkilegt við Shaquem Griffin og gerir hann merkilegri en aðra magnaða stráka sem eru á leiðinni að verða milljarðamæringar á næstu árum eftir að komast inn í NFL-deildina?

Hann er handarlaus.

Griffin er tvíburi en bróðir hans, Shaquill, komst inn í NFL-deildina í fyrra og spilar með Seattle Seahawks. Þeir bræðurnir fæddust með 60 sekúndna millibili og eru eins að öllu leyti fyrir utan einn galla á Shaquem.

Þegar Shaquem var í maga móður sinnar flæktist vefur um vinstri hönd hans sem gerði það að verkum að fingurnir náðu aldrei að vaxa sökum skorts á blóðflæði.

„Ég man þegar að ljósmóðirin kom með hann til mín og ég fjarlægði teppið sem huldi hann. Þá sá ég þetta,“ segir Tangie Griffin, móðir tvíburana, með tárin í augunum í viðtali við ESPN þar sem saga Shaquem er rakin.

Þessi fæðingargalli átti eftir að hafa mikil áhrif á piltinn á fyrstu árum ævi hans er hann upplifði mikinn sársauka. Svæðið var svo viðkvæmt að hver einasta skráma varð til þess að Shaquem grét vegna ofsafengins sársauka.

„Ég mun aldrei gleyma sársaukanum,“ segir Shaquem sem gafst upp á sársaukanum þegar að hann var fjögurra ára gamall. Þá var hann búinn að fá nóg.

Hann fór fram í eldhús um miðja nótt þegar að sársaukinn var búinn að yfirbuga hann. Shaquem tók upp hníf og ætlaði að skera af sér höndina.

„Ég man enn þá eftir hvernig hann grét og öskraði,“ segir bróðir hans, Shaquill, en Shaquem fékk ósk sína uppfyllta nokkrum dögum síðar þegar að höndin var fjarlægð af skurðlæknum.

Móðir hans segir að hún vissi um leið að það var rétt ákvörðum því þar hófst líf Shaquem Griffin fyrir alvöru.

Foreldrar hans kvöttu drenginn til að fylgja draumum sínum og stunda íþróttir af kappi. Tvíburarnir voru frábærir íþróttamenn í menntaskóla og fengu báðir skólastyrk hjá UCF-háskólanum í Flórída. Shaquill varð fljótlega stjarna en hinn handarlausi Shaqueem fékk fá tækifæri á sínum fyrstu árum.

Griffin var stundum við það að gefast upp en bróðir hans barði í hann kraft á erfiðustu stundunum og það átti eftir að skila sér. Shaqueem beið eftir tækifærinu sem kom á þriðja ári þegar að nýr þjálfari, Scott Brown, tók við.

Griffin sló í gegn á síðustu leiktíð en hann náði ellefu leikstjórnendafellum og var kjörinn besti varnarmaður sinnar deildar. Nú gæti hann verið á leið í NFL-deildina.

„Hann vill ekki láta líta á sig sem fatlaðan leikmann. Hann vill bara fá að spila leikinn eins og allir hinir. Ég er viss um að fullt af fólki hefur sagt við hann í gegnum tíðina að hann ætti ekki að spila amerískan fótbolta ef ef maður þráir eitthvað nógu heitt getur ekkert stöðvað þig. Shaquem hefur sannað það,“ segir Scott Brown.

Aðeins bestu leikmönnum háskólaboltans er boðið á hið svokallaða NFL Combine þar sem þeir sýna sig fyrir þjálfurum deildarinnar. Þeir hlaupa, stökkva, kasta og grípa í von um að vera svo valdir eins ofarlega og mögulegt er í nýliðavalinu.

Shaquem Griffin gjörsamlega stal senunni og braut næstum því internetið þegar að hann hljóp 40 jardana á 4,38 sekúndum. Aldrei áður hefur varnarmaður í hans stöðu [Linebacker] hlaupið jafnhratt. Hann hljóp á sama tíma og bróðir sinn í fyrra sem er bakvörður en hans staða snýst um að vera eins fljótur og mögulegt er.

Hver NFL-stjarnan á fætur annarri sendi honum skeyti á Twitter og sagði einn besti bakvörður deildarinnar, Richard Sherman hjá Seattle Seahawks, að kerfið væri í ólagi ef Shaquem yrði ekki valinn í fyrstu tveimur umferðum nýliðavalsins.

Shaquem hleypur ekki bara hratt. Hann lyfti 102 kg í brekkpressu 20 sinnum nánast án þess að svitna og sýndi svo að handarleysið kemur ekki í veg fyrir að hann geti hreyft sig í leiknum og hvað þá gripið boltann.

„Mér líður frábærlega. Það er frábært að fá að upplifa þetta. Ekki bara það að hlaupa hratt heldur bara að vera hérna og hitta nýtt fólk. Leiðin hefur verið löng en ég er ánægður með að vera kominn hingað og er bara að njóta þess að vera hér,“ sagði skælbrosandi Shaquem Griffin eftir frammistöðuna í gær.

Nýliðavalið hefst 26 apríl og verður fróðlegt að sjá hvort eitthvað lið taki sénsinn á handarlausum leikmanni sem er að minnsta kosti kominn þetta langt og hefur ekki látið neitt stöðva sig.

NFL

Mest lesið


Fleiri fréttir

Sjá meira


×

Mest lesið