Lífið

Pálmi ætlar að stilla sér upp fyrir framan Sóla

Jakob Bjarnar skrifar
Skemmtunin fyrir norðan, Hólm á Hattinum, gæti tekið meira á taugarnar en Sóli hugði.
Skemmtunin fyrir norðan, Hólm á Hattinum, gæti tekið meira á taugarnar en Sóli hugði.

Pálmi Gunnarsson söngvari ætlar að setja Sóla Hólm stólinn fyrir dyrnar þá er sá síðarnefndi ætlar að troða upp á Græna hattinum á Akureyri á næstunni.

Sóli Hólm, fjölmiðlamaður, skemmtikraftur og eftirherma, hefur átt við krabbamein að stríða á undanförnum mánuðum en hafði fullnaðarsigur við þann volduga óvin. Í kjölfarið ákvað hann að standa við fyrirheit sem hann gaf sjálfum sér fyrir margt löngu, sem er að setja á svið sérstaka uppistandssýningu. Sóli sagði meðal annars frá þessu í þættinum Harmageddon fyrir ekki svo löngu síðan.

Sýningin hefur tekist vonum framar, fullt hús, gríðarleg stemmning og ætlar Sóli að troða upp á Græna hattinum á Akureyri: Hólm á Hattinum, fimmtudaginn 15. febrúar, tilkynnti Sóli fjallbrattur á sinni Facebooksíðu.

En, hann var ekki fyrr búinn að tilkynna þetta en Pálmi Gunnarsson tónlistarmaður boðaði komu sína:

„Ég mæti og sest beint fyrir framan þig, í hálfs meters fjarlægð. Þetta er hótun,“ segir Pálmi og sýnir hornin. En, Pálmi er búsettur nyrðra.

Þannig er að Sóli er sérfræðingur í að herma eftir Pálma og hefur það verið liður í hans skemmtanahaldi. Sóli er að vonum nokkuð skelkaður og viðurkennir það fúslega: „Ég er í alvörunni hræddur.“



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.