Guardiola: Verðum ekki værukærir

Pep Guardiola sagði að sínir menn í Manchester City verði ekki værukærir, þeir vilji alltaf skora annað mark.

City komst 2-0 yfir gegn Watford á heimavelli í gærkvöld eftir tæpar 15 mínútur.

„Nei,“ sagði Pep einfaldlega, aðspurður hvort hann hefði haft áhyggjur af værukærð eftir að hafa komist yfir svo snemma. „Jú, það kemur fyrir, en ekki hjá þessu liði. Við getum spilað vel eða illa en við reynum alltaf að skora annað mark og bera virðingu fyrir leiknum.“

Hans menn hefðu getað skorað mun fleiri mörk í gærkvöld, en Guardiola var sáttur með stigin þrjú.

„Við sköpuðum okkur mikið af færum og hefðum getað skorað 5-6 mörk, en þau urðu bara þrjú og það var nóg. Við viljum alltaf skora en þetta snýst um að vera betri en andstæðingurinn í hverjum leik og við gerðum það,“ sagði Pep Guardiola.